«Қайрат» дебютанты – «Брюггемен» болған ойын жайлы: батылырақ әрекет ету керек еді

«Қайрат» клубының жартылай қорғаушысы Мұхамедәли Әбіш ASnews.kz сайтына берген сұхбатында бельгиялық «Брюггемен» болған матчқа (1:4) қатысты пікір білдірді.

«Әрине, жастар арасындағы және ересектер арасындағы Чемпиондар лигасын салыстырсақ, мұнда тәжірибе шешуші рөл атқарады. Ойын қарқыны мүлдем бөлек, қарсыластар да физикалық тұрғыдан әлдеқайда мықты.

Өзім үшін матч жаман өткен жоқ, алайда алаңда сенімді әрі батыл ойнау керек еді, – деді Әбіш.

«Қайрат» Чемпиондар лигасының жетінші турында «Брюггеге» 4:1 есебімен жол берді.

Бұл кездесу Мұхамедәли Әбіш үшін негізгі командадағы алғашқы матч болды. Бұған дейін ол жастар арасындағы Чемпиондар лигасында «Қайрат» U-19 командасының, сондай-ақ бірінші лигада «Қайрат-Жастар» ұжымының намысын қорғаған.