«Брюгге» жанкүйері – Астанада «Қайратпен» болатын ойын жайлы: барлығымыз өз қаражатымызға келдік

Қазақстанға сүйікті командасын қолдау үшін арнайы ұшып келген бельгиялық «Брюгге» клубының жанкүйері Эйден ASnews.kz тілшісімен болған әңгіме барысында сапар шығындары мен Чемпиондар лигасындағы матч жайлы пікірімен бөлісті.

Әйел кісі жанкүйерлік мәдениетке ерекше тоқталды. Оның айтуынша, 500-ден астам бельгиялық жанкүйер Астанаға толықтай өз қаражатына келген, бұл олардың клубқа деген адалдығын айқын көрсетеді.

«Бұл – Қазақстанға алғаш рет келуіміз. Мұндағы адамдар өте жақсы әрі қонақжай екен. Астана суық болғанымен, бізге бәрі ұнап жатыр.

500-ден астам бельгиялық жанкүйер осы ойынға арнайы ұшып келгенін естідіңіз бе? Барлық шығынды жанкүйерлер өздері көтереді: ұшақ билеті, тұратын жер және тамақтану. «Брюгге» – Бельгиядағы үлкен клуб, жанкүйерлері де көп. Еурокубок аясындағы кез-келген матчта біздің фанаттар сырт алаңдағы ойындарға міндетті түрде барады», – деді Эйден.

Сонлай-ақ бельгиялық жанкүйер «Қайратқа» қарсы өтетін ойынға қатысты пікірімен бөлісті. Оның пікірінше, бапкер ауысуы «Брюггеге» әзірге толықтай өз ойынын көрсетуге мүмкіндік беріп отырған жоқ.

«Меніңше, матч тең нәтижемен аяқталады. 1:1 немесе 2:2 болар. Қазір команданың жаңа бас бапкері – Иван Леко, сондықтан ойыншылар бар әлеуетін толық көрсете алмай жүр. Әрине, біз жеңісті қалаймыз, бірақ ең ықтимал нәтиже – тең ойын», – деп түйіндеді жанкүйер.

«Қайрат» пен «Брюгге» арасындағы кездесу 20 қаңтар күні «Астана Аренада» өтеді. Басталу уақыты – 20:30.