«Брюгге» шабуылшысы – «Қайратпен» болатын матч жайлы: нәтиже көрсетіп, плей-оффқа шығуымыз керек

«Брюгге» клубының шабуылшысы Ромео Вермант матч алдындағы баспасөз мәслихатында соңғы сәтсіздіктерден кейін команданың көңіл-күйі мен дайындығына қатысты пікір білдірді, деп хабарлайды ASnews.kz.

Форвард ішкі турнирлердегі екі бірдей сәтсіздіктен кейін бельгиялық ұжымға Чемпиондар лигасында міндетті түрде оң нәтиже қажет екенін атап өтті.

«Меніңше, «Брюгге» секілді клубта қатарынан екі рет жеңілу қалыпты жағдай емес. «Қайратқа» қарсы өте маңызды ойын күтіп тұр. Егер Чемпиондар лигасында келесі кезеңге өткіміз келсе, нәтиже көрсетуіміз керек. Біз бұған толық дайын болуға тиіспіз», – деді Вермант.

Сондай-ақ футболшы өзінің денсаулығына қатысты жағдайды да нақтылады. Вермант чемпионаттағы соңғы ойынды өткізіп алған болатын.

«Қазіргі таңда өзімді жақсы сезінемін. «Ла-Лувьерге» қарсы матчта аздаған жайсыздық болды, бірақ қазір алаңға шығуға толық дайынмын», – деп қосты шабуылшы.

«Қайрат» пен «Брюгге» арасындағы кездесу ертең, 20 қаңтарда, «Астана Аренада» өтеді.

Бұған дейін бельгиялық клуб чемпионатта күтпеген жерден аутсайдер саналатын «Ла-Лувьерге» 2:3 есебімен жеңілген болатын. Ал одан алдын ел кубогынан шығып қалды.