Уразбахтин – «Брюггемен» болатын матч жайлы: бірінші рет осындай жағдайға тап болдық

«Қайраттың» бас бапкері Рафаэль Уразбахтин баспасөз мәслихатында Чемпиондар лигасындағы ойын қарсаңында команданың кадрлық жағдайы мен физикалық дайындығына тоқталды, деп хабарлайды ASnews.kz.

Алматылықтардың бапкері бұл матчта қысқы трансферлік кезеңде келген жаңа ойыншылар мен жарақаты бар бірнеше футболшының алаңға шыға алмайтынын растады.

«Командамызға жаңадан қосылған ойыншыларға келсек, олар алдағы матчтарға қатыса алмайды. Былтырғы маусымда тіркелген футболшыларға сенім артамыз. Құрамда көп өзгеріс болмайды: бұған дейін ойнаған жігіттерді ертең де алаңнан көресіздер.

Офри Арад ота жасатқандықтан, соңғы ойындарды өткізіп алды. Гиорги Зария да болмайды. Қалған футболшылар матчқа қатысады.

Ал Сатпаевқа келсек, Дастанды бұл ойында мүлдем көрмейміз – ол ем қабылдап жатыр. Бұл біз үшін үлкен шығын, алайда ойыншының, әсіресе Дастан секілді футболшының денсаулығы бәрінен маңызды. Оның тезірек сауығып кетуін тілейміз және алаңға қайта оралуын асыға күтеміз», – деді Уразбахтин.

Сонымен қатар бас бапкер маусымның тым ерте басталуы мен команданың дайындық барысына да тоқталды.

«Біз алғаш рет осындай жағдайға тап болып отырмыз – бұған дейін ресми матчтарды мұншалықты ерте өткізбеген едік. Абу-Дабиде оқу-жаттығу жиынымыз болды, дайындалуға уақытымыз жеткілікті болды. Дегенмен, осы қысқа мерзім ішінде қалыпқа келу оңай емес.

Қуантарлығы – жігіттер нағыз кәсіби мамандар екенін көрсетті: демалыс кезінде берілген тапсырмалардың бәрін орындады. Олардың демалысы үш аптадан сәл ғана көп болды. Команда жаттығуларға нөлдік деңгейде емес, жақсы физикалық жағдайда келді. Бәрін қайтадан бастауға тура келген жоқ. Белгілі бір жұмыс атқардық. Иә, әзірге бабымызда емеспіз, бірақ соған қарамастан, ертең лайықты деңгейде өнер көрсетуге тырысамыз», – деп қосты ол.

Чемпиондар лигасының жетінші тур аясындағы «Қайрат» – «Брюгге» кездесуі ертең, 20 қаңтарда «Астана Аренада» өтеді. Басталу уақыты – 20:30. Бұл алматылық клубтың еурокубок маусымында өз алаңында өткізетін соңғы ойыны болмақ.