ЧЛ жеңімпазы – қосалқы құрамда: инсайдер «Брюггенің» «Қайратқа» қарсы матчтағы құрамын ұсынды

Бельгиялық сарапшы әрі беделді HLN порталының тілшісі Томас Таке ASnews.kz сайтына берген сұхбатында Чемпиондар лигасындағы «Қайратқа» қарсы матчта алаңға шығуы мүмкін «Брюгге» құрамын ұсынды.

Инсайдердің айтуынша, негізгі вингер Христос Цолис жарақатына байланысты бұл ойынды өткізіп алады. Ал Карлос Форбстың қатысуы әзірге күмән тудырғанымен, журналист оны негізгі құрамда алаңға шығады деп болжады.

«Брюггенің» мүмкін құрамы:

• Қақпашы: Якерс
• Қорғаушылар: Саббе, Ордоньес, Мехеле, Сейс
• Жартылай қорғаушылар: Станкович, Ветлесен, Ванакен (капитан)
• Шабуылшылар: Форбс (?), Тресольди, Диахон

Қосалқы құрам: Миньоле, Ванден Дрише, Осуджи, Сике, Мейер, Рейс, Сандра, Кэмпбелл, Вермант.

Жарақат алғандар: Нильссон, Цолис.

Кездесуде қақпаны Нордин Якерс қорғайды деп күтілуде, ал жұлдызды қақпашы Симон Миньоле қосалқы құрамда қалады. Бұрын «Ливерпульде» ойнаған, Чемпиондар лигасының 2018/19 жылғы маусымдағы жеңімпазы желтоқсан айында алған жарақатынан кейін енді қатарға қосылған.

Миньоле – «Брюгге» үшін аса маңызды ойыншы. Ол клуб сапында 298 матч өткізіп, төрт рет Бельгия чемпионы атанған.

Матч 20 қаңтар күні өтеді және Қазақстан уақытымен 20:30-да басталады.

Сондай-ақ «Астана Аренада» өтетін кездесуге шамамен 500 бельгиялық жанкүйер келеді деп күтілуде.