Ресейлік сарапшы – «Қайраттың» ЧЛ-дағы ойыны жайлы: «Брюггеге» қарсы ойында Анарбеков құтқаруы тиіс

«Қайратты» Чемпиондар лигасында тартысты матч күтіп тұр: команда «Астана Аренада» «Брюггені» қабылдайды. Қатал климат алматылықтардың пайдасына жұмыс істеуі мүмкін, алайда қарсыластың ойын қарқынын өз қолына алып, үш ұпайды Бельгияға алып кетуге шамасы жетеді.

ASnews.kz сайтына берген сұхбатында ресейлік сарапшы, Okko Спорт спикері Артем Прожога қонақтардың Чемпиондар лигасының жетінші тур ойынына қандай жағдайда келіп жатқанын айтып берді.

Жаңа күшпен шығуға дайын

«Қайратқа» қарсы «Брюггенің» қандай құраммен шығатынын «Ла-Лувьермен» болатын ойыннан кейін аңғаруға болады. Плей-оффқа шығу мүмкін еместей көрінгенімен, менің ойымша, Чемпиондар лигасындағы ойындарға басымдық берген дұрыс. Қалай болғанда да, жеңіске жету керек: бұл Бельгияның коэффициенттер кестесіндегі орнын нығайтып қана қоймай, клубтың қаржысын да арттырады. Практика тұрғысынан тиімді.

Сондай-ақ «Ла-Лувьердің» «Брюггемен» ойынға дейін Кубокта көп күш жұмсағанын ескеру қажет. Олар 90 емес, 120 минут ойнады, сондықтан әлі тәжірибесі аз әрі лига аутсайдері саналатын команданы негізгі құрамсыз-ақ ұтуға болады, – деді Прожога.

Жауынгерлік рух

«Ла-Лувьердің» басты күші алаңдағы ойыншыларда емес, қақпада. Маркос Пеано – тамаша голкипер әрі чемпионаттағы «құрғақ» матчтар саны бойынша көшбасшылардың бірі. Сол ойындардың бірін ол алғашқы айналымда дәл осы «Брюггеге» қарсы өткізді (1:0). Бірақ Иван Леконың командасы реванш алуы тиіс».

Алматылықтар әлсіз тұстарды пайдалануы керек

«Жақында «Брюгге» маусым барысында көшбасшы командадан 19 ұпайға қалып келе жатып, чемпион атанды. Ал қазір арадағы ұпай айырмасы бар болғаны бір ұпай. Сондықтан Чемпиондар лигасындағы ойындарға басымдық беріп, ашуды «Қайраттан» алған жөн болар еді. Мәселе – энергияның жету-жетпеуінде.

Команда 2025 жылы қатты шаршаған: кейбір ойыншылар Еуропада ең көп ойын өткізген футболшылардың қатарына кірді, ал Қазақстанға дейін ұзақ сапар мен суық ауа-райы күтіп тұр. Осындай жағдайда еш қиналмай үш ұпай алу күмән тудырады. «Қайрат» «Ла-Лувьер» секілді төмен блокта әрекет етіп, Анарбековке және стандарттарға иек арта алады», – деп түйіндеді сарапшы.

Матч 20 қаңтар күні елордада өтеді. Бұл – «Қайраттың» өз алаңында өткізетін еурокубок маусымындағы ойыны. Чемпиондар лигасының жалпы кезеңіндегі соңғы матчын команда сырт алаңда «Арсеналға» қарсы өткізеді.

«Брюгге» Бельгия чемпионатының турнирлік кестесінде екінші орында тұр. Команданың жалпы құрамы 194,1 млн еуроға бағаланады. Алматылықтарға қарсы матчтың алдында «Брюгге» қаңтардың 16-нан 17-не қараған түні «Ла-Лувьермен» ойнайды.

Бұған дейін «Қызылжардың» бельгиялық экс-қорғаушысы Брайан Ван Ден Богарт «Қайраттың» «Брюггеге» қарсы матчтағы мүмкіндігін бағалаған еді.