«Олимпиакос» шабуылшысы Астанадағы аяз туралы: дірілдедік, бірақ бұл ойынға әсер еткен жоқ

Грекиялық «Олимпиакостың» шабуылшысы Мехди Тареми «Қайратты» (1:0) жеңгеннен кейінгі әсерімен бөлісті, деп хабарлайды ASnews.kz.

«Бұл ауыр ойын болды, біз «Қайраттың» лайықты қарсылас болатынын күткенбіз. Басынан бастап ойынды бақылауға және мүмкіндіктер жасауға тырыстық. Бірінші тайм біз үшін қиын болды – жоспарлаған нәрсені істей алмадық. Бірақ екінші таймда гол соқтық, содан кейін бәрі жақсы болды.

Ауа райына келетін болсақ, біз шынымен дірілдедік (күледі). Бірақ бұл біздің ойынымызға әсер еткен жоқ. Бәрі жақсы өтті. Біз келесі ойынды күтіп отырмыз.

Біз команда болып ойнаймыз, мен әрқашан барымды салуға тырысамын. Ең бастысы – біз жеңдік. «Қайрат» – жақсы команда, осы уақытқа дейін олар тамаша жұмыс атқарды. Олар жоғары прессинг жасады, күрделі қарсылас болды. Оларды құрметтеймін және сәттілік тілеймін», – деді Тареми.

«Қайрат» Чемпиондар Лигасының алтыншы турында «Олимпиакосқа» 0:1 есебімен жеңіліп, бесінші рет жеңіліс тапты. Бұл грек клубы үшін турнирдегі алғашқы жеңіс болды. Қазақстандық клубтың қаңтарда екі қорытынды матчы қалды: 20-ында өз алаңында бельгиялық «Брюггеге» қарсы және 28-інен 29-ына қараған түні Лондонда «Арсеналға» қарсы ойнайды.

Бұған дейін «Қайрат» шабуылшысы Жоржиньо матчта негізгі құрамға енбеуіне қатысты пікір білдірген болатын.