Уразбахтин – «Олимпиакоспен» болатын матч туралы: жасанды төсенішке үйреніп қалдық

«Қайрат» клубының бас бапкері Рафаэль Уразбахтин «Олимпиакоспен» болатын Чемпиондар лигасының матчы жайлы пікір білдірді, деп хабарлайды ASnews.kz.

«Қарсыластың қаншалықты күшті екенін білеміз. Оларды жақсылап зерттедік, чемпионат пен Чемпиондар лигасындағы ойындарын тамашаладық. Нәтижелерінің өзі клубтың мықты екенін көрсетіп тұр. Бір жыл бұрын Конференция лигасын жеңіп алды. Жастары (U19) Чемпиондар лигасында топ жарды. Жап-жақсы испаниялық бапкері бар. Шабуыл шебі жақсы ойыншылардан құралған. Қарсыласымыз қаншалықты күшті болса, бізге соғұрлым жақсы. Мықты командаларға қарсы өзімізді сынап көреміз.

«Олимпиакос» қазір барлық турнирде ойнап жатыр. Екі күн бұрын чемпионаттағы ойынын өткізді. Олардың бізді жақсылап зерттемегенін менсінбеушілік деп есептемеймін.

Александр Мартынович жарақатынан айығып, қатарға қосылды. Матчқа дайындық қалыпты деңгейде өтті. Демалып та үлгердік.

Жасанды төсенішке үйренісу үшін Астанаға бес күн бұрын келіп, жаттығу жұмыстарын жасадық. Бұл жерде бір аптадай дайындалдық. Жігіттердің ешқандай шағымы жоқ. Ертең жақсы нәтиже тіркеуге тырысамыз. Себебі матч Қазақстанда өтіп жатыр. Әр ойын сайын команданың ойынында прогресс байқалуда. Тек тұрақтылық жетіспеуде», – деді Уразбахтин.

Чемпиондар лигасының алтыншы турындағы «Қайрат» пен «Олимпиакос» арасындағы матч 9 желтоқсанда «Астана Арена» стадионында өтеді.