Мата – «Пафоспен» болған матч туралы: ең бастысы Қазақстан чемпионы атануымыз керек

«Қайраттың» португалиялық қорғаушысы Луиш Мата ASnews.kz тілшісіне берген сұхбатында Чемпиондар лигасының үшінші турында кипрлік «Пафос» командасымен (0:0) өткен ойыннан кейінгі эмоцияларымен бөлісті.

«Әртүрлі эмоциялар болуда, өйткені біз жанкүйерлер үшін де, өзіміз үшін де жеңіске жетуді қаладық. Әрине, бұл біздің Чемпиондар лигасындағы алғашқы ұпайымыз, бірақ матчтың басында қарсыласымыздың қызыл қағаз алғанын ескерсек, біз жеңуіміз керек еді. Өз мүмкіндіктерімізді пайдалана алмадық, сондықтан бір ұпаймен шектелдік. Бірақ бұл жеңілгеннен гөрі жақсы», – деді Мата.

Ол «Пафос ойыншысының алаңнан қуылуына қатысты мынадай пікір білдірді:

«Иә, бұл жерде қызыл қағаз дұрыс көрсетілді, себебі өте қауіпті жағдай орын алды. Жарақат алмағаныма қуаныштымын. Әрине, содан кейін бізге ойнау оңайырақ болды. Жеңе алмадық, бірақ ұтылмай, қақпамызға гол өткізбегеніміз де көңіл қуантады».

Матаның айтуынша, қазір команда толығымен КПЛ-дағы «Астанаға» қарсы шешуші матчты ойлап отыр:

«Ен бастысы - Қазақстан чемпионы атану. Жексенбі күні стадион толып, жеңісті бірге тойлаймыз деп сенемін. Бұл өте маңызды. Команда мен жанкүйерлер осы сәтке лайық».

Чемпиондар лигасының үшінші турында «Қайрат» кипрлік «Пафоспен» тең түсіп, топтық кезеңдегі алғашқы ұпайына қол жеткізді. 26 қазанда алматылықтар ҚПЛ чемпионын анықтау үшін «Астанамен» кездеседі.