Гиорги Зария: сенімді түрде ойнай алмай, сасқалақтап қалдық

«Қайраттың» жартылай қорғаушысы Гиорги Зария ASnews.kz тілшісіне берген сұхбатында Чемпиондар лигасында кипрлік «Пафоспен» болған ойынды қорытындылап, «Астанаға» қарсы шешуші матч жайлы пікір білдірді.

«Бұл турнирдегі алғашқы тәжірибеміз, бізге тәжірибе жетіспеуде. Матч кезінде сасқалақтап қалдық, негізінде, сабыр сақтап, сенімдірек ойнап, мүмкіндігінше шабуылдап, гол соғуымыз керек еді. Біз жақсы ойнадық, бірақ шабуылды аяқтайтын соққы және гол жетіспеді.

Тактикалық тұрғыдан бапкер сұрағанның барлығын дерлік орындадық. Ең бастысы, мүмкіндігімізді пайдалана алмадық.

«Астанаға» қарсы финалдық ойынға келетін болсақ, дайындықты ертең бастаймыз. Матчқа толықтай дайын боламыз. Біз жыл бойы бірінші орында болуға тырыстық», – деді Зария.

«Қайрат» әзірге «Астанадан» екі ұпайға алда тұр. Қазақстан чемпионы 26 қазанда қос команда арасындағы матчта шешіледі.