Евгений Савин – «Қайраттың» қарсыласы жайлы: «Пафос» – бұл кипрлік ПСЖ

Кипрлік «Красава» футбол клубының президенті, танымал блогер Евгений Савин ASnews.kz тілшісіне берген сұхбатында «Қайраттың» Чемпиондар лигасындағы «Пафоспен» болатын ойыны жайлы пікірімен бөлісті.

«Пафос» қазіргі таңда Кипрдің «Пари Сен-Жермені». Олар ойыншыларға да, маркетингке де қомақты қаржы құю арқылы басқа клубтардан ерекшеленеді. Қазір құрамында Давид Луис секілді бразилиялық ойыншылар бар. Олар өте мықты және ойыны мен құрамы біркелкі үйлестірілген команда – мұны олардың Киевтің «Динамосын» еш қыиндықсыз жеңгенінен байқай аламыз.

Бірақ «Қайрат» өз алаңында ойнайды, жанкүйерлері көп болады. Олардың жеңіске жететін мүмкіндігі бар. Оның үстіне жеребеден кейін белгілі бір эйфория болды, сондықтан алматылық команда соңына дейін күреседі деп ойлаймын. «Пафос» қаншалықты мықты болса да, оларды жеңуге болады. «Менің болжамым: «Қайрат» бұл ойында жеңілмейді», - деді ресейлік функционер.

Савин Қазақстандағы футбол жанкүйерлеріне де үндеу тастады:

«Қазақстанға және барлық клубтардың жанкүйерлеріне үлкен сәлем. «Қайраттың» негізгі кезеңге жолдама алғанына өте қуаныштымын, Боранбаевты құттықтаймын. Бұл академияға инвестиция салып, жеке қаржымен команданы дамытсаңыз, мақтанатындай нәтижеге қол жеткізетініңіздің тағы бір мысалы. Алға!»

«Қайрат» бүгін Чемпиондар лигасының негізгі кезеңі аясында Орталық стадионда «Пафосты» қабылдайды. Кипрліктер «Динамодан» бөлек, іріктеу кезеңінде «Маккаби» мен «Црвена Звезданы» жеңді.