«Жеңістің» экс-қорғаушысы – «Қайраттың» ЧЛ-дағы матчы жайлы: «Пафосқа» басымдық беремін

«Жеңіс» клубында доп тепкен кипрлік қорғаушы Константинос Венизелу ASnews.kz тілшісіне берген сұхбатында Чемпиондар лигасы аясында өтетін «Қайрат» пен «Пафос» матчы туралы пікірімен бөлісті.

«Әрине, «Қайрат» та, «Пафос» да мұндай деңгейде бірінші рет ойнап жатқандықтан, айқын фаворитті айту қиын. Бірақ таңдау керек болса, мен Давид Луиз, Мислав Оршич және т.б. сияқты тәжірибелі ойыншылары бар «Пафосқа» басымдық берер едім.

«Қайратқа» келетін болсақ, олар жақсы ойыншылардан жасақталған, сапалы және жылдам шабуылдары бар өте мықты команда – олар кез-келген қарсыласқа қиындық тудыруы мүмкін», – деді Венизелу.

Чемпиондар лигасының үшінші турындағы «Қайрат» пен «Пафос» арасындағы ойын 21 қазан күні Алматыдағы Орталық стадионда өтеді.

24 жастағы Венизелуды осы жылы «Жеңіс» жалға алды. Кипрлік қорғаушы елордалық клуб сапында 13 ойын өткізген.

Кейін ол Кипрге оралды және 2025 жылдың күзінде ПАЕЕК Кериния командасымен келісімшартқа отырды. Ол бұған дейін «Омония» (Никосия), «Отеллос Афинья» және италиялық «Пескара» U-19 сапында ойнаған.