Бекбаев – «Реалмен» болған ойын жайлы: Громыконың құлаған сәті күмән тудырады

«Ордабасы» мен Қазақстан құрамасының бұрынғы қақпашысы Алмат Бекбаев ASnews.kz тілшісіне «Қайрат» - «Реал» матчындағы 0:5 есебі ойынның қалай болғанын көрсетпейтінін айтты.

«Менің ойымша, ешкім ірі жеңіліс болады деп күткен жоқ. Біз «Реал Мадрид» ойыншыларының ұзақ сапардан кейін шаршағанына және алаңның сапасына сенім арттық. Сол күні Орталық стадионның төсеніші жақсы болған сияқты. Ал есеп ойынның қалай болғанын көрсетпейді – 0:3 болған кезде тоқтай салу керек еді (күлді).

Громыкоға қарсы ереже бұзылды ма? Динамикадан бұл пенальти сияқты көрінді, бірақ басқа ракурстан қарағанда мүлдем басқаша болды – мен ешқандай маңызды жанасуды байқамадым. Қалай болғанда да, біз көрсетілімді жақсартуымыз керек, себебі қайталаулар жеткіліксіз болды. Пенальти жайлы нақты ештеңе айта алмаймын», – деді Бекбаев.

Екінші таймның ортасында алматылық клубтың жартылай қорғаушысы Валерий Громыко «Реалдың» айып алаңында құлап түсті. Бастапқыда Марко Гуида нүктені нұсқағанымен, VAR-ды қарағаннан кейін өзінің алғашқы шешімін жоққа шығарды.

«Қайрат» екі турдан кейін Чемпиондар лигасының турнирлік кестесінде соңғы орында келеді.