«Қайраттың» бразилиялық шабуылшысы: ЧЛ-дағы тәжірибе келесі жылы көмектеседі

Алматылық «Қайраттың» шабуылшысы Рикардиньо ASnews.kz тілшісіне берген сұхбатында Чемпиондар лигасы жайлы және кипрлік «Пафос» командасына қарсы өтетін алдағы матч туралы ойымен бөлісті.

«Әрине, «Реал Мадрид» туралы айтып отырған жоқпыз, бірақ біз Чемпиондар лигасындағы басқа да мықты командалармен ойнай аламыз. Бұл біздің алғашқы қадамымыз ғана. Егер еурокубоктың осы маусымын лайықты түрде өткізетін болсақ, бұл тәжірибе бізге келесі жылы өз септігін тигізеді. Ол үшін Қазақстан чемпионатында да топ жарып, Чемпиондар лигасына қайтадан жолдама алуымыз керек», – деді бразилиялық футболшы.

Футболшы команданың әлі де прогресс жасап жатқанын атап өтті:

«Менің ойымша, бұл процесс. Егер біз оған сенсек, уақыт өте келе күшейеміз. «Пафосқа» қарсы келесі матч өз алаңымызда болады, мұндай жағдайда ұпай алуға деген мүмкіндігіміз жоғары».

Рикардиньоның айтуынша, команда турнирдің деңгейін біледі және соған сай жұмысты жалғастыруға дайын:

«Чемпиондар лигасы – әрқашан қиын турнир; тек мықтылар ғана іріктеуден өтеді. Әрбір ойын қиын болады. Біз көп жұмыс істеп, қарсыластарымызды зерттеп, ұпай алу үшін барымызды салуымыз керек».

«Қайрат» Чемпиондар лигасындағы алғашқы екі ойынын өткізді. Лиссабонда «Спортингтен» (1:4) ұтылды, ал Алматыда «Реалға» (0:5) жол берді.

Рафаэль Уразбахтин шәкірттерінің келесі ойыны Кипрдің «Пафос» командасына қарсы 21 қазан күні Алматыда өтеді және бұл «Қайрат» үшін турнирдегі алғашқы ұпайларын алу үшін үлкен мүмкіндік болайын деп тұр.