Луиш Мата: басты мақсат – чемпион атану

Алматылық «Қайраттың» қорғаушысы Луиш Мата ASnews.kz тілшісіне берген сұхбатында «Реалдан» 5:0 есебімен жеңілгеннен кейінгі эмоцияларымен бөлісіп, команданың маусымның қалған кезеңіндегі мақсаттарына тоқталды.

«Иә, бүгін мен бірнеше жақсы соққы жасадым. Бұл алдын-ала жоспарланған тактика емес еді; ойын барысында солай болып қалды. Алыс қашықтықтан соққы жасауға мүмкіндіктер туындады, мұны пайдалануға тырыстым. Бірақ өкінішке орай, гол соға алмадым. Бәрібір тырысып көрдім.

Біз бұл кездесуге тактикалық тұрғыдан дайындалдық, бірақ, әрине, өте қиын ойын болды. 5:0 есебі тым ауыр. Енді алда «Жетісуға» қарсы ойын бар. Менің ойымша, бұл бүгінгіден де маңызды матч. Өйткені біз чемпион атануымыз керек. Бұл біз Еуропаға оралып, Чемпиондар лигасында ойнай алатын жалғыз жол», – деді Мата.

Ойыншы команданың ішкі біріншілікке ден қойғанын баса айтты:

«Бүгін өте жақсы ойын болды, өйткені бұл Чемпиондар лигасы. Бірақ мен өз командамды білемін – енді біз жеңіске жету үшін әр матчта барымызды саламыз. Басты мақсат – чемпион атану. Бұл «Қайрат» үшін өте маңызды. Біз тағы да чемпион боламыз деп ойлаймын. Бұл қолымыздан келеді».

«Қайрат» Чемпиондар лигасының екінші турында Алматыда «Реалдан» 5:0 есебімен жеңілген болатын. Килиан Мбаппе хет-трик жасаса, Эдуардо Камавинга мен Браим Диас бір-бір голдан соқты.