Рикардиньо – «Реалға» қарсы матч жайлы: бірінші болып соғуымыз керек еді

Алматылық «Қайраттың» шабуылшысы Рикардиньо ASnews.kz тілшісіне берген сұхбатында мадридтік «Реалға» (0:5) қарсы өткен Чемпиондар лигасы матчы жайлы ойымен бөлісті.

«Чемпиондар лигасында мұндай қарсыластарға қарсы ойнау оңай емес. Бірақ өзім үшін де, командам үшін де мақтанамын, өйткені бұл – әлемдегі ең мықты турнир. Ойындардың ауыр болатынын білдік. Соған қарамастан, мақтануымыз керек, себебі әр футболшы осы додада ойнауды армандайды», – деді бразилиялық футболшы.

Рикардиньо Алматыдағы тарихи ойынды ерекше атап өтті:

«Қазақстанда осындай турнирде ойнау – керемет сезім. Бұл біз үшін үлкен тәжірибе болды. Алғашқы 10–15 минут тең дәрежеде өтті, кейін жағдай өзгеріп кетті. Мұндай деңгейдегі кездесулерде жақсы бастау және сол қарқынды соңына дейін сақтау өте маңызды».

Шабуылшы қарсыластың деңгейін бағалап, алдағы матчтарға сенім білдірді:

«Реал» – өте мықты команда. Олар есепте алға шыққан соң бірден ойынды бақылауға алды. Келесі матчтарда біз үшін ең маңыздысы – бірінші болып гол соғу және артықшылықты ұстап тұру. Бұл оңай болмайды, бірақ біз соған ұмтылуымыз керек», – деді Рикардиньо.

Айта кетейік, «Қайрат» тарихындағы алғашқы өз алаңындағы топтық кезең матчын өткізді. Аншлагпен өткен ойында алматылықтар мадридтік «Реалдан» 0:5 есебімен ұтылды. Қонақтардан Килиан Мбаппе хет-трик жасаса, тағы бір голды Эдуарду Камавинга, бір голды Браим Диас соқты.

Бұл «Қайраттың» турнирдегі екінші жеңілісі болды – бұған дейін алматылықтар Лиссабонда «Спортингке» (1:4) жол берген еді.