Испаниялық эксперт – Алматыдағы матч жайлы: ЧЛ – «Қайраттың» жас ойыншылары үшін үлкен сахна

Diario Sport басылымының испаниялық журналисі Алекс Калафф ASnews.kz тілшісіне берген сұхбатында Чемпиондар лигасының екінші турындағы «Қайрат» пен «Реал Мадрид» кездесуінен не күтетінін айтып берді.

«Хаби Алонсо командасының әлі толық құрылмағанын айтты. Бірақ мадридтіктер әр матчта жеңіске жетуді қалайды, «Атлетикоға» қарсы драмадан кейін олар тағы ұпай жоғалтпауы тиіс. Әсіресе «Қайрат» сияқты командаға қарсы», – деді журналист.

Калафф мұндай матчтардың тек клубтар үшін ғана емес, жас ойыншылар үшін де маңызды екенін атап өтті.

«Әрине, бұл «Қайратқа» және барлық басқа командаларға қатысты. Чемпиондар лигасы – әлемдегі ең үздік клубтарға өз өнеріңізді көрсететін ең үлкен сахна. Скауттар мұндай матчтарды үнемі тамашалайды, сондықтан ойыншылардың өз атын шығаруға мүмкіндігі бар», – деп қосты ол.

«Қайрат» Чемпиондар лигасының екінші турында Алматыда «Реалды» қабылдайды. Ойын бүгін Орталық стадионда өтеді және Астана уақытымен 21:45-те басталады.