Испаниялық журналист: «Атлетикодан» жеңілгеннен кейін «Реал» үшін Алматыдағы матч маңызды болады

Испаниялық EFE агенттігінің басшысы Хосе Игнасио Ортега ASnews.kz тілшісіне берген сұхбатында Алматыдан алған әсерімен және «Қайрат» – «Реал Мадрид» матчы жайлы пікірімен бөлісті.

«Қазақстанға бірінші рет келіп тұрған жоқпын; бұған дейін Астанада болдым, бірақ бұл Алматыға бірінші рет келуім. Мұнда келуді қатты қаладым, өйткені екі қаланың айырмашылығы жер мен көктей, ал футбол матчы жақсы сылтау болды. Маған бұл жер ұнады. Алматыда үшінші күнімді өткізудемін. Қала әдемі, Астана, Мәскеуге қарағанда ауа-райы жағымды, тамақтары да жақсы, қыздары да әдемі», – деді журналист.

Ортега Мадрид дербиінен кейін жағдайдың өзгергенін баса айтты.

«Егер сіз бір апта бұрын сұрасаңыз, мен: «Реал Мадридте ротация болады, Мбаппе келмейтін шығар және олар үшін бұл оңай ойын болады» деп айтар едім. Бірақ «Атлетикодан» жеңілгеннен кейін жағдай өзгерді: Мбаппе келеді, Винисиус келеді – барлық көшбасшылар осында. Неге дейсіз бе? Өйткені команда өз қақпасына бес гол жіберіп алды. Қазір Алматыдағы матч «Реал» үшін өте маңызды. Егер олар дербиден кейін ұтылса немесе тең түссе, бұл үлкен дағдарыс», – деді Ортега.

30 қыркүйекте Алматыдағы Орталық стадионда Чемпиондар лигасының екінші тур ойыны өтеді: «Қайрат» өз алаңында «Реалды» қабылдайды. Басталуы Астана уақытымен 21:45-те.