Дастан Сәтпаев: «Реалды» таңқалдыруға тырысамыз, олар бізді қорғанысқа қамалады деп ойлайтын шығар

«Қайраттың» 17 жастағы шабуылшысы Дастан Сәтпаев Qsport арнасына берген сұхбатында Чемпиондар лигасының екінші турында «Реалмен» болатын матч жайлы пікір білдірді, деп хабарлайды ASnews.kz.

– «Спортингке» қарсы матчта сенде гол соғатын бірнеше мүмкіндік болды. Ертең «Реал» ойыншылары сізге сондай мүмкіндік бере ме?

– Иә, бәрі мүмкін. Бастысы өзімізге сеніп, ертеңгі матчта жеңіске жетуіміз керек.

– «Реал» мен «Спортинг» қорғаушылары сен үшін жұлдыз ба әлде жай ойыншылар ма?

– Барлық адамдар бірдей ғой. Иә, деңгейінің жоғары екені анық, бірақ оларға қарсы ойнауға болады.

– Ал сен жұлдызсың ба?

– Әзірге жоқ.

– Алматы халқының «Реалдың» келгеніне реакциясын байқадың ба?

– Әрине, әлеуметтік желіден бәрін байқап, көріп отырмыз. Матчқа билет алып үлгермегендер стадионның айналасындағы биік ғимараттардан орын іздеуде. Адамдардың футболға қызығып, бізді қолдап жатқаны көңіл қуантады.

– «Реалға» қарсы ойын қандай сценариймен өтуі мүмкін?

– Өте қиын болады деп ойлаймын. Өйтені, бұл мүлдем басқа деңгейдегі қарсылас. Ең бастысы, оларға қарсы тұрып, жеңіске жетуіміз керек.

– «Реалдың» қорғаныста әжептеуір мәселелері бар. «Атлетико» оларға бес гол соқты. Бұл туралы не айтасың?

– Біз «Атлетико» емеспіз. Бірақ оларға бірнеше гол соғуға тырысамыз. Олардың құрамында Чемпиондар лигасында мол тәжірибе жинаған қорғаушылар бар. Сондықтан қиын болады.

– «Реал» Алматыда өзін жайсыз сезіну үшін не істеу керек?

– Шабуылға негізделген футбол ойнауымыз қажет. Олардың таңқалатыны анық. Бізді қорғанысқа қамалады деп ойлап отырған шығар. Егер шабуылды көп ұйымдастырсақ, бәрі қолымыздан келеді.

– Жанкүйерлерге не айтасыз?

– Ертең стадионға келетін жанкүйерлердің бәріне алғыс айтқым келеді. Бастысы, бізге сеніңіздер, Құдай қаласа, барлығы жақсы болады.