«Жеңістің» экс-шабуылшысы: «Реалға» қарсы ойыннан ләззат алу керек

«Жеңістің» бұрынғы шабуылшысы Мигель Анхель Хунко Мартинес ASnews.kz тілшісіне берген сұхбатында «Қайрат» футболшыларының Чемпиондар лигасында «Реалға» қарсы ойыннан ләззат алу керектігін айтты.

«Қайраттың «Реалға» қарсы қалай ойнайтынын айту қиын. Мен бапкер емеспін. Бірақ ойыншы ретінде айта аламын: ең бастысы осы сәттен ләззат алу керек, өйткені Чемпиондар лигасында қайта ойнау мүмкіндігің болатын-болмайтынын ешқашан білмейсің. Әсіресе, «Реалға» қарсы ойнайсың ба, белгісіз. Ойыннан ләззат алып, әдеттегідей ойнау керек. Барын салып, бапкердің айтқанын орындауы тиіс», – деді испан футболшысы.

«Қайрат» Чемпиондар лигасының екінші турын 30 қыркүйекте Алматыда «Реалға» қарсы өткізеді. Бұл алматылық команданың өз алаңындағы алғашқы ойыны болмақ.

Мика атымен танымал Мигель Анхель Хунко Мартинес – «Райо Кантабрия» клубының түлегі. Ол Испания, Финляндия, Малайзия және Камбоджа клубтарында ойнады. Ал «Жеңіс» сапында бес кездесу өткізіп, екі гол соқты, содан кейін елордалық клубтан кетіп, қазір командасыз жүр.