Испаниялық футболшы – «Қайрат» – «Реал» ойыны жайлы: сенсация болуы мүмкін

«Жеңістің» бұрынғы шабуылшысы Мигель Анхель Хунко Мартинес ASnews.kz тілшісіне «Қайраттың» Чемпиондар лигасының екінші турында «Реалмен» болатын ойыны туралы пікір білдірді.

«Бұл «Қайрат» үшін өте маңызды матч болады, өйткені, биыл «Реал Мадрид» өте күшті көрінеді. Бірақ бұл футбол – сіз ешқашан не болатынын білмейсіз, мүмкін сенсация болатын шығар. Өткен маусымда Чемпиондар лигасында не болғанын ескере отырып, «Реал Мадрид» барлық көшбасшыларын Алматыға әкеледі деп ойлаймын. Турнирдің жаңа форматында олар әр ойында жеңіске жетіп, плей-офф кезеңіне мүмкіндігінше тезірек шығуды көздейді», – деді испаниялық футболшы.

Мика деген атпен танымал Мигель Анхель Хунко – испаниялық «Райо Кантабрия» клубының түлегі. Кәсіби мансабында «Альмудевар», «Сариньену», «Туделано», «Марино Луано», «Херес Депортиво» және «Химнастика Сеговиана» командаларында ойнады.

Ал Испаниядан тыс камбоджалық «Свайриенге», малайзиялық «Негри Сембилан» және финляндиялық «KTП» командаларында ойнады. Дәл сол «КТП» клубымен бірге ол Финляндияның жоғарғы дивизионына шығып, 2022 жылғы маусымның үздік сұрмергені және ойыншысы атанды.

Қазақстанда Мика «Жеңіс» сапында бес кездесу өткізіп, екі гол соқты. Кейінірек қос тарап келісімшартты бұзу туралы ортақ мәмілеге келді.

«Қайрат» пен «Реал Мадрид» арасындағы ойын 30 қыркүйекте Алматыдағы Орталық стадионда өтеді.