Бекбаев – «Қайраттың» жеңілісі туралы: Қалмұрзаны кінәлауға болмайды

«Ордабасы» мен Қазақстан құрамасының бұрынғы қақпашысы Алмат Бекбаев ASnews.kz тілшісіне берген сұхбатында Шерхан Қалмұрзаны «Спортингпен» (1:4) болған матчтың үздік ойыншысы деп санайтынын айтты.

«Қалмұрза пенальтиді қайтарады деп күтпедім, бірақ жоғарыда айтқанымдай, «Қайраттың» қақпашылары биыл ғаламат өнер көрсетуде. Ол бірінші таймда үздік болды, екінші таймда да тамаша өнер көрсетті. Соғылған голдардың ешқайсысында Шерханның кінәсі жоқ, оны бұл жеңіліс үшін кінәлаудың қажеті жоқ. Ал қорғаушылар үлкен жүктемеге тап болды», – деді тәжірибелі қақпашы.

18 жастағы қақпашы кеше «Қайрат» сапындағы екінші ойынын өткізді. Бірінші таймда ол Мортен Юльманның пенальтиін қайтарған болатын.