Ербол Қайыров: «Қайрат» ұтылды, бірақ ұлттық құрама секілді дәрменсіз болған жоқ

Футбол сарапшысы әрі журналист Ербол Қайыров «Қайраттың» Чемпиондар лигасының бірінші турында «Спортингтен» жеңілгеніне (1:4) қатысты пікір білдірді, деп хабарлайды ASnews.kz.

«Қайраттың Чемпиондар лигасындағы алғашқы қадамы, бәріміз күткендей, сәтсіздікке ұшырады. Бірінші таймда үміт болған еді, әсіресе Қалмұрза пенальтиді қайтарғаннан кейін. Мұндай сәттер әдетте қақпашыларға қосымша күш береді, бірақ өкінішке орай, жолымыз болмады. 0:1 есебімен ұтылып жатқан кезде Жоржиньо қақпашыдан айласын асырғанда, интрига оралатын еді», – деді Қайыров

Қазақстандық комментатор «Спортинг» ҚПЛ-мен салыстырғанда мүлдем басқа жылдамдықта ойнайтынын, оған үйрену қиын екенін атап өтті. Соған қарамастан, сарапшының айтуынша, «Қайрат» жақсы ойнады:

«Бельгиядан 6:0 есебімен жеңілген ұлттық құрамаға қарағанда, «Қайрат» дәрменсіз көрінбеді. Жігіттер тырысты, жүгірді, күресті. Мұның бәрі тарих. Ал тарихты жазу кез-келген адамның қолынан келе бермейді».

«Қайрат» Чемпиондар лигасының бірінші турында «Спортингтен» 1:4 есебімен жеңіліп қалды. Шерхан Қалмұрза бірінші таймда пенальти қайтарғанымен, үш минуттың ішінде үш гол жіберіп алды.