BBC Sport тілшісі – «Қайраттың» ЧЛ-на шығуы туралы: барлығы дебютанттан тосынсый күтуде

BBC Sport порталының тілшісі Джордж Аддо BorodAbata.kz (AS News) тілшісіне берген сұхбатында «Қайраттың» Чемпиондар лигасына шығуы және Еуропаның топ-клубтарымен өтетін алдағы матчтарына қатысты Батыс БАҚ-тың реакциясына баға берді.

– Батыста «Қайраттың» үздік командалар тобына түсуіне деген реакция қалай болды?

– Менің ойымша, бұл ешкім күтпеген жаңалық болды. Соңғы рет Чемпиондар лигасында қазақстандық клубтардың ішінен «Астананы» көрдік, олар туралы жанкүйерлер біраз нәрсе білетін еді. Ал «Қайрат» көлеңкеден жарқ ете шыққандай болды: көбісі олардың жасаған еңбегін байқамай қалды. «Бұл қандай клуб, олар не істей алады?» деген реакция болды. Олардың жүріп өткен жолын естіп, сіз сияқты қазақ журналистерімен тілдесіп, прогрессін байқаған жұрт «Қайратты» бағалай бастады. Енді топтық кезең басталғанда барлығы ертегі күтуде: бәлкім бұл олардың қолынан келетін шығар. Әрине, «Қайрат» турнирде жеңіске жетеді деп ешкім күтпейді, бірақ тосынсый болатынын болжап отыр. Себебі дебютантқа деген қызығушылық өте жоғары.

«Қайрат» өз тарихында алғаш рет Чемпиондар лигасының негізгі кезеңіне жолдама алды. Алматылық команда сегіз матч өткізеді – төртеуін өз алаңында, төртеуін сырт алаңда.

Алматыда «Қайрат» Мадридтің «Реалын», «Брюгге», «Олимпиакос» және «Пафос» командасын қабылдайды. Ал сырт алаңда «Интер», «Арсенал», «Спортинг» және «Копенгаген» клубтарымен кездеседі.