«Олимпиакос» футболшысының агенті – «Қайрат» туралы: түркілердің қолынан бәрі келеді

«Олимпиакостың» жартылай қорғаушысы Юсуф Языджидың агенті Адем Чебеджи ASNews.kz (BorodAbata) тілшісіне берген сұхбатында «Қайраттың» грекиялық клубты жеңуге қауқарлы екенін айтты. Олар Чемпиондар лигасының алтыншы турында кездеседі.

«Түркілер өздеріне сенсе, бәріне де қабілетті. Сондықтан «Қайрат» да оңтайлы тактиканы таңдаса, жеңіске жете алады. Кадрлық жағынан алғанда, «Олимпиакос» мықтырақ көрінуі мүмкін, бірақ қазақтардың рухы бар. Оны алаңда көрсетуі тиіс, себебі бұл олардың ойыны.

Юсуфқа келетін болсақ, ол жақында ауыр жарақатынан айығып, енді ғана қалыпқа келуде. Өкінішке орай, бапкер оны Чемпиондар лигасына арналған өтініміне қоспады», – деді түрік футболшысының өкілі.

Алматылықтар 9 желтоқсанда Орталық стадионда «Олимпиакос» командасымен ойнайды. Қазіргі уақытта олар Грекия Суперлигасында көш бастап келеді.

Языджи крест байламының үзілуіне байланысты 228 күн алаңға шықпай, қатарға осы жазда оралды. Жартылай қорғаушы бұған дейін «Трабзонспор» және «ЦСКА» командаларында да ойнаған.