Дастан Сәтпаев аты аңызға айналған музыкант Элтон Джонның көңілін қалдырды: толығырақ

Атақты британдық әнші әрі «Уотфордтың» жанкүйері Элтон Джон сүйікті командасының өз алаңында қазақстандық шабуылшы Дастан Сәтпаев өнер көрсететін «Бернлиден» ойсырай жеңілуіне (0:4) қатысты қатты қынжылыс білдірді, деп хабарлайды ASnews.kz.

«Уотфорд» футбол клубының өмірлік жанкүйері ретінде мен соңғы бірнеше аптадағы команданың құлдырауына өте қатты қайғырып, көңілім қалды. Бұны көруге мәжбүр болған басқа да жанкүйерлердің жай-күйін терең түсінемін», – деп жазды аңызға айналған музыкант өзінің әлеуметтік желісінде.

Еске салайық, Ағылшын Чемпионшипінің тоғызыншы туры аясында «Бернли» сырт алаңда «Уотфордты» 4:0 есебімен сенімді түрде ұтты. Кездесу тағдыры бірінші таймда-ақ шешілді, алаң қожайындарының қақпасына Якуб Бруун Ларсен (13-минут), Зеки Амдуни (19-минут) және Рео Хатате (25-минут) жауапсыз үш доп соқты. Ал ойынның 87-минутында Маркус Эдвардс бұрыштамадан асырылған допты әдемі голға айналдырып, нүкте қойды.

Жарақатынан айығып қатарға қосылған қазақстандық шабуылшы Дастан Сәтпаев ойынды қосалқы құрамда бастап, 74-минутта Бруун Ларсеннің орнына алаңға шықты. Матч соңында жерлесіміз Джейми Вардиге нәтижелі пас берген еді, алайда төреші офсайд тіркеп, гол есепке алынбады. Бұл табыс «Бернли» үшін биылғы Чемпионшип маусымындағы алғашқы жеңіс болды. Команда жеті ұпай жинап, 23-орынға көтерілгенімен, әзірге төменгі лигаға түсіп қалу қаупі бар аймақта қалып отыр.

Айта кетейік, сэр Элтон Джон – поп және рок-музыканың дамуына зор ықпал еткен тарихи тұлға. Ол өз мансабында жүз миллиондаған пластинкаларын сатып, Your Song, Rocket Man және Candle in the Wind сияқты ондаған әлемдік хиттерді жарыққа шығарған. Сонымен қатар, музыкант табынушылыққа айналған «Арыстан патша» (Король Лев) мультфильміне жазған музыкасы үшін «Оскар» сыйлығының иегері атанған.

«Ол мұндай тығыз кестеге үйренбеген»: Ники Хайен Сәтпаевтың жарақаты мен ойын уақыты туралы