«Ол мұндай тығыз кестеге үйренбеген»: Ники Хайен Сәтпаевтың жарақаты мен ойын уақыты туралы

Англиялық «Бернлидің» бас бапкері Ники Хайен ASnews.kz тілшісіне берген сұхбатында қазақстандық шабуылшы Дастан Сәтпаевтың жарақаттан кейінгі жағдайы және оның ойын уақытын шектеу себептері туралы айтып берді.

«Уотфордқа» қарсы жеңісті матчта Сәтпаев алаңда шамамен 20 минуттай өнер көрсетті. Бапкердің айтуынша, бұл шешім ағылшын футболындағы тығыз күнтізбеге байланысты медициналық штабпен ақылдаса отырып қабылданған.

«Иә, Дастан бұрын матч артынан матч ойнамаған, аптасына үш кездесу өткізуге дағдыланбаған. Сондықтан оның жүктемесін бейімдеуге тура келеді. Дәрігерлермен бірге шештік: ол бұл ойында небәрі 20 минут ойнай алады. Әрі қарай бақылауымыз керек, өйткені келесі матч өтетін сейсенбіге дейін уақыт аз. Қайта жарақат алмайтындай дайындауымыз қажет. Ойыншыларды қорғап, ең дұрыс шешімді табу маңызды», – деді Хайен.

Сондай-ақ, «Бернли» тәлімгері шабуылшының қалпына келу барысына көңілі толатынын жеткізді.

«Бәрі жақсы. Ол жаттығуларда өзін тамаша көрсетті. Ойынға қосылғанда да командаға қауіп әкелетінін бүгін көрдіңіздер. Бірақ мен тек Дастан туралы ғана сөйлескім келмейді. Бұл нағыз командалық ойын болды. Әркім өз деңгейінде ойнаса, осы маусымда әлі де жақсы нәтижелерге жете аламыз», – деп түйіндеді маман.

Еске салайық, Чемпионшиптің тоғызыншы турында «Бернли» сырт алаңда «Уотфордты» 4:0 есебімен тас-талқан етті. Бұл ойында Дастан Сәтпаев 74-минутта қосалқы құрамнан алаңға шығып, матч соңында Джейми Вардиге нәтижелі пас берген еді, алайда төреші офсайд тіркеп, гол есепке алынбады.