Сәтпаевтың «Бернлидегі» бапкері Ники Хайен Лига кубогынан шығып қалуы туралы пікір білдірді

«Бернлидің» бас бапкері Ники Хайен өз командасының Англия Лига кубогынан шығып қалуына қатысты пікір білдіріп, «Брэдфордқа» қарсы ойынның сапасын бағалады, деп хабарлайды ASnews.kz.

«Лайықты матч өткіздік деп ойлаймын. Допты жақсы ұстадық, бос кеңістік тауып, мүмкіндіктер жасадық. Жетпей қалған жалғыз нәрсе – гол. Бұл бір аптаның ғана мәселесі емес: бізге гол соғу шынымен де қиынға соғып жүр. Мәселе тек шеберлікте емес, дұрыс шешім қабылдауда. Кейде күрделі нұсқалардан қашып, салқынқанды әрекет ету керек.

Пенальти сериясы – бұл лотерея. Өзіне жауапкершілік алған ойыншыны ешқашан айыптамаймын. Әрине, біз негізгі уақытта жеңіске жеткіміз келді, бірақ ол үшін қарсыластың айып алаңында нақты шешім қабылдауымыз керек еді. Жанкүйерлердің ренішін, тіпті ашуын толық түсінемін, мен бұл реакцияны қабылдаймын. Бірақ біз жағдайды түзей алатынымызды білеміз және аянбай жұмыс істеуді жалғастырамыз», – деді Хайен.

«Бернли» пенальти сериясында «Брэдфордқа» 2:4 есебімен жол беріп (негізгі уақыт – 0:0), Англия лига кубогындағы өнерін аяқтады.

Бұл матчта «Бернлидің» бастапқы құрамында 18 жастағы қазақстандық шабуылшы Дастан Сәтпаев алаңға шығып, 80 минут өнер көрсетті.

Алдағы демалыс күндері «Бернли» чемпионатта «Норвичке» қарсы кездесу өткізеді.

«Қазақтар Кола, ал еуропалықтар протеин ішеді»: Норвегиядағы отандасымыз Холандтың клубынан бас тартуы мен құрама туралы