Еуропалық клубтың бапкері қазақстандық футболшыларды мақтады: жарып шығуға жақсы мүмкіндігі бар

Беларустік «Барановичи» клубының бас бапкері Роман Киренкин ASnews.kz сайтына берген сұхбатында қазақстандық футболшылар Ерсұлтан Төреқұл мен Әліби Тұзақбаевтың бейімделуі туралы айтып берді.

Жоғары лигадағы қазақстандықтар – жаңа тренд пе?

«Ең алдымен, бұл жігіттердің өзінің қалауы болды – чемпионатты ауыстырып, бағын Қазақстаннан тыс жерде сынап көргісі келді. Олардың ҚПЛ жұлдыздары болмағанына келсек? Беларусьпен салыстырғанда сіздердің елде өте үлкен ақша төленетінін түсіну керек.

Біз отандық футболшыларды ойнау практикасынсыз қалдыратын мұндай деңгейдегі легионерлерді шақыра алмаймыз. Сондықтан олар өздерін көрсете алатын, бапкерлер мен журналистерге қызықты болатын «Барановичи» мен «Нафтанға» ауысады.

Меніңше, Қазақстанның бірінші лигасында қосалқы құрамда отырғанша, осы жерде ойнаған әлдеқайда артық», – деді 45 жастағы бапкер.

«Қайсардың» бұрынғы шабуылшысы Төреқұл БАТЭ-ге қарсы дебютінде ассистпен көзге түсті

«Ерсұлтанның нәтижелі іс-әрекетіне қарамастан, мен Әлібиді де атап өтер едім. Дегенмен жігіттерге физикалық тұрғыдан әлі де ауырлау екені көрініп тұр – бір жарым айлық үзілістен кейін бізбен бірге жаттыққандарына бар болғаны бірнеше күн ғана болды. Оңтайлы бабына келу үшін тағы сондай уақыт кетеді.

Менің байқауымша, жаңадан келгендер іске кәсіби тұрғыда қарайды. Жаттығуға дейін де, кейін де өздерін дайындайды. Біз бір тілде сөйлескенімізбен, оларға ұжымға бейімделіп, үйренісу керек, ал әзірге жақсы әсер қалдырып жатыр: ашық-жарқын, тез тіл табысады.

Бапкерлік штаб мүмкіндігінше Төреқұл мен Тұзақбаевқа ойын уақытын береді. Мұндай қарым-қатынаспен олардың мүмкіндігі өте жоғары, бірақ бәрі алаңда өзін қалай көрсететініне байланысты – жалғыз көрсеткіш осы».

Команданың мақсаттары қандай?

«Біз жоғары лигаға алғаш рет түстік, бірақ жанкүйерлер тарапынан үлкен назарды сезінеміз. Моншада, дүкенде, көшеде – барлық жерде: «Барановичи», «Барановичи», «Барановичи». Тіпті кафеде суретке түсіп жатады. Бірақ клуб тым үлкен жоспарлар құрып отырған жоқ.

Мақсат: лигадағы орнымызды сақтап қалу және чемпионатқа орнығу, өйткені бүкіл командадан тек Пуховта ғана қажетті тәжірибе бар. Қалғандары – жастар немесе мұнда толыққанды маусым өткізбегендер. Олар үшін бұл да тәжірибе және жылдамдықтар мен танымалдылыққа үйрену», – деп түйіндеді Киренкин.

«Тараздың» 27 жастағы форварды Ерсұлтан Төреқұл, сондай-ақ «Тұранның» 26 жастағы жартылай қорғаушысы Әліби Тұзақбаев Беларусь жоғары лигасының дебютанты «Барановичи» сапын толықтырды.

17 турдың қорытындысы бойынша Брест облысының командасы турнирлік кестеде 12-орында келеді.