«Қазақстанға оралу үшін Чемпионшиптан бас тартты»: Чесноковтың агенті – Англия тарапынан болған қызығушылық туралы

Футбол агенті Ярослав Зварич ASnews.kz сайтына берген сұхбатында Қазақстан құрамасының вингері Ислам Чесноковқа Англиядан түскен ұсыныс пен футболшының қайтадан Еуропа чемпионатына ауысу мүмкіндігі туралы айтып берді.

Шотландиядағы тәжірибесі туралы

«Ислам Еуропада өзін сынап көргеніне дән риза. Нәтижелі болды ма, жоқ па, бірақ ол соңғы сәтке дейін чемпиондық үшін күресті. Сондықтан Еуропадағы бұл қысқа кезең оның жүрегінде мәңгі сақталады.

26 жаста Еуропаға есік әлі де ашық па? Бәрі өзіне байланысты. Егер тағы бір рет бағын сынағысы келсе, ол тағы да кете алады. Ал егер қаламаса, Қазақстан футболына пайдасын тигізеді.

Исламның болашағы зор. Қайда ауысса да, жоғалып кетпейді, өйткені Ислам – жоғары деңгейдегі футболшы. Меніңше, ол Бельгияда, Польшада, Түркияда және кез келген басқа чемпионатта ойнай алар еді», – деді Зварич.

Англиядан түскен ұсыныс

«Бір сәтте тіпті Чемпионшип клубы тарапынан қызығушылық болды. Ол кезде олар Англияның үшінші дивизионында өнер көрсететін. Олар Чехия чемпионатынан жас украиналық футболшыны сатып алды және ол туралы сипаттаманы мен бергендіктен, үнемі байланыста болдық. Кейін олар Исламды да алып келуді өтінді. Ол кезде мен бас тарттым, өйткені «Хартс» нұсқасы әлдеқайда тиімді еді.

Кейінірек ол клуб Чемпионшипке жолдама алғанда, Исламды бір маусымға жалға алғысы келді. Алайда Ислам бірден бас тартып, Қазақстанға оралғысы келетінін айтты», – деді агент.

Чесноков шотландиялық «Хартс» сапына 2026 жылдың қаңтарында ауысты. Эдинбург клубында 11 матч өткізіп, бір гол соқты және Шотландия чемпионатының күміс жүлдегері атанды.

2026 жылдың жазында 26 жастағы жартылай қорғаушы қостанайлық «Тобылға» қайта оралды.

«Ақша қызықтырған жоқ»: Чесноковтың агенті «Тобыл» мен «Хартстағы» жалақы айырмашылығы туралы