Ресейде Дастан Сәтпаевтың «Ювентуске» қарсы ойынына баға берілді

Ресейлік Okko Спорт комментаторы Эльвин Керимов ASnews.kz басылымына берген сұхбатында «Челсидің» қазақстандық шабуылшысы Дастан Сәтпаевтың «Ювентуске» қарсы жолдастық кездесудегі (0:1) өнерін бағалады.

«Сәтпаев алаңға жақсы кірісті: айып алаңының сыртынан дәл соққы бағыттады, прессинг жасап, ортада да, қапталында да белсенділік танытты. Оның әлі әріптестерімен толық түсінісіп үлгермегеніне баса назар аударудың қажеті жоқ – қазірше ешкімде өзара түсіністік қалыптасқан жоқ.

Қазір біз сансыз ауысуларды көріп отырмыз, бәрі әлі шикі. Алонсоның «Челсиде» жұмыс істеп жатқанына үш-ақ апта болды, сондықтан асығыс қорытынды жасамаған жөн», – деді сарапшы.

Бұдан бөлек, Керимов 17 жастағы форвардтың лондондық клубтағы болашағына қатысты болжамымен бөлісті:

«Бәсеке өте жоғары – шабуыл шебінде футболшылар өте көп. Соған қарағанда, Дастан жалға берілетін сияқты. Егер ол «Страсбур» болса, мұның тек пайдасы тиеді. Ойын тәжірибесісіз ештеңе шықпайды», – деп қосты ол.

Еске сала кетейік, Дастан Сәтпаев «Ювентуске» қарсы бақылау матчында 25 минут өткізіп, қақпаға бір дәл соққы жасады. SofaScore порталы оның ойынын 7/10 деген баллмен бағалады – бұл «Челси» футболшылары арасындағы ең жоғары көрсеткіштердің бірі.

БАҚ өкілдерінің мәліметінше, Қазақстан құрамасының жас ойыншысы «Страсбурға» жалға берілуі мүмкін. Лондондықтар сияқты, француз клубы да BlueCo консорциумының басқаруында.

Гонконгтағы қошемет: қазақстандықтар Сәтпаевтың «Ювентуске» қарсы матчта қолдады (видео)

Сәтпаев бастаған «Челси» Гонконгтағы бақылау матчында «Ювентуске» жол берді