«Барлық әңгіме – ойыннан кейін»: Мартин – «Ордабасыдағы» болашағы туралы

Шымкенттік «Ордабасының» бас бапкері Андрей Мартин Қызылорданың «Қайсарына» қарсы Қазақстан кубогының финалы алдында өткен баспасөз мәслихатында командадағы болашағы туралы пікір білдірді, деп хабарлайды ASnews.kz.

«Мүлде білмеймін. Келісімшартым 30 қарашаға дейін жарамды, жұмыс істеуге дайынмын және өз міндетімді соңына дейін орындауым керек. Маған бұл жоба қызықты, үлкен құлшыныспен еңбек етіп жатырмын. Командамен бірге тек ертеңгі матч туралы ойлауға назар аудардық. Қалғанын ойын аяқталған кейін басшылықпен талқылаймыз. Қазіргі сәтте мені алдағы кездесуден басқа ештеңе қызықтырмайды», – деді маман.

Айта кетейік, «Ордабасы» мен «Қайсар» арасындағы Қазақстан кубогының финалы 7 қарашада Түркістандағы «Түркістан Арена» стадионында өтеді және сағат 16:00-де басталады. Шымкенттік клуб шешуші бәсекеге елдің қолданыстағы чемпионы мәртебесінде келе жатса, «Қайсар» өткен маусымның қорытындысы бойынша Премьер-лигадан шығып калып, Бірінші лигаға түсіп қалды.