Матч орталығы
«Чемпиондар лигасын ұтсам, жолдастық матчта ойнатады»: Шайзада – құрамадағы жағдай туралы
17 қараша, 17:34

Фото: Бекхан Шайзада
Шымкенттік «Ордабасы» мен Қазақстан ұлттық құрамасының қақпашысы Бекхан Шайзада Ұлттар лигасының матчтарында ойын уақытының берілмеуіне қатысты пікір білдірді, деп хабарлайды ASnews.kz.
Турнирдің бес ойынына ұлттық құрама сапына шақырту алған голкипер солайша алаңға шыққан жоқ. Өзінің Instagram-аккаунтында Шайзада Stories жариялап, қалыптасқан жағдайға қатысты жазба қалдырды:
«Чемпиондар лигасын ұтсам, жолдастық матчта ойнатады, Ин Ша Аллах», – деп жазды футболшы.
2026 жылғы маусымда Шайзада «Ордабасы» сапында Қазақстан чемпионаты мен Кубогын жеңіп алып, KFF Awards рәсімінде «Жыл қақпашысы» номинациясында үздік атанған болатын. Соған қарамастан, құраманың бапкерлер штабы Ұлттар лигасында шақырылған қалған қақпашылардың барлығына мүмкіндік берді: Стас Покатилов төрт матч өткізсе, Александр Заруцкий мен Темірлан Анарбеков бір-бір кездесуден ойнады.
Еске сала кетейік, Қазақстан құрамасы Ұлттар лигасы топтық кезеңінің алты турында бірде-бір жеңіске жете алмай (үш тең ойын және үш жеңіліс), C3 квартетінде соңғы, төртінші орынға тұрақтады.
Ахмет Ержанов