Матч орталығы
«Қазақстан тең түсуі мүмкін»: словакиялық сарапшы Ұлттар лигасындағы матч туралы пікір білдірді
16 қараша, 12:45

Словакиялық журналист Данил Дедина ASnews.kz сайтына берген сұхбатында Ұлттар лигасы аясындағы бүгінгі матчта Қазақстан құрамасының мүмкіндіктеріне баға беріп, өз командасының құрамындағы өзгерістер туралы пікірін айтты.
«Словакия құрамасының бұл матчта қандай ойын көрсететінін болжау қиын. Негізгі құрамдағы футболшылардың ішінен алаңға алғашқы минуттан бастап тек Лукаш Гараслин ғана шығуы мүмкін. Дегенмен, Словакия Қазақстанды менсінбей ойнайды деп ойламаймын. Енді эксперименттік құрамның қаншалықты үйлесімді ойын көрсетіп, қандай деңгейде өнер көрсететінін көреміз. Мәселен, мен чехиялық «Виктория» клубында ойнайтын 19 жастағы қорғаушы Тобиаш Палишчактың өнерін тамашалауға асықпын. Словакияда оны Петер Пекарик пен Давид Ганцконың орнын басуы мүмкін ойыншылардың бірі деп санайды», – деді Дедина.
Сондай-ақ журналист қос команда арасындағы алдыңғы кездесуге тоқталды:
«Қазақстан құрамасының Словакияға қарсы өткен алдыңғы матчтағы ойыны маған өте жақсы әсер қалдырды. Қарсылас бізге біраз қиындық туғызып, жеңіске жету үшін бар күшімізді салуға мәжбүр етті. Сол кездесуден кейін Қазақстанды Словакияның топтағы бірінші орын үшін басты қарсыласы болады деп ойлағанмын. Сондықтан одан кейінгі нәтижелер мен үшін күтпеген жағдай болды. Әсіресе, Молдовамен өткен екі матчта бірде-бір ұпай жинай алмағаны таңғалдырды. Өйткені, меніңше, Қазақстан құрамындағы футболшылардың деңгейі молдовалықтардан жоғары.
Егер Қазақстан құрамасы Кошицеде көрсеткен ойынын қайталай алса, тең түсуге, тіпті одан да жақсы нәтижеге қол жеткізуге мүмкіндігі бар. Словакия діттеген мақсатына жетіп, В дивизионына жолдама алды. Алайда командамыздың көптеген матчтағы ойыны көңіл көншіте қойған жоқ», – деп түйіндеді журналист.
Ұлттар лигасының алтыншы турындағы Қазақстан мен Словакия құрамалары арасындағы соңғы кездесу бүгін, 16 қарашада «Астана Арена» стадионында өтеді. Матч Астана уақытымен сағат 20:00-де басталады.
Владимир Вайсс жаттықтыратын Словакия құрамасы C3 тобында 11 ұпай жинап, бірінші орынды мерзімінен бұрын қамтамасыз етіп қойды. Осылайша, команда В дивизионына жолдама алды. Словакиялықтар Қазақстанға қарсы ойынға бірқатар өзгеріспен келіп отыр.
Ал Қазақстан құрамасы бес турдан кейін екі ұпаймен соңғы орында тұр.
Әлім Динасылов