Еуропалық клубтағы қазақстандық футболшы: ұлттық құрамаға оралғым келеді

Молдовалық «Зимбру» сапында өнер көрсететін қазақстандық футболшы Камила Совет ASnews.kz сайтына берген сұхбатында шетелдегі бейімделу кезеңі туралы әсер бөлісіп, ұлттық құрамаға қайта оралуды қалайтынын айтты.

«Мәдениеті өзгеше, басында біраз қиын болды. Бірақ футбол – ол қай жерде де футбол, бейімделуге көмектеседі. «Зимбру» – жас команда және жас ойыншылар. Дамуға барлық перспектива бар. Тәжірибемнің арқасында біраз жоғары деңгейде көрінетін шығармын. Басқа клубтарға ауысу туралы ұсыныстарға келетін болсақ, әзірге ондай ұсыныс түскен жоқ, қазір маусымның қызған шағы және желтоқсанда үзіліс болады. Құрамаға қайта оралу ма? Әрқашан өз еліңді қорғағың келеді, бұл – үлкен мәртебе әрі мақтаныш. Сол жаққа қайтадан оралу үшін жұмыс істейтін боламын», – деді Совет.

Еске сала кетейік, 22 жастағы футболшы қорғаушы және жартылай қорғаушы позицияларында өнер көрсетеді. Бұған дейін Совет шымкенттік БИІК пен «Ұлытау», сондай-ақ албаниялық «Киностудио» клубтарының намысын қорғаған. Ол Қазақстан ұлттық құрамасына соңғы рет 2024 жылы шақыртылған болатын.