Ғалымжан Кенжебек Кипрге кету себебін түсіндірді

Қазақстан құрамасының ойыншысы Ғалымжан Кенжебек YouTube-тағы BorodAbata арнасына берген сұхбатында Кипрге кету себебін түсіндірді.

Менен барлығы «Кипрге не үшін кеттің?» деп сұрайды. Өйткені маған жарты жыл сол жақта ойнауға тура келді. Менің агентім Мамуканың (Маму Ломидзе) Сергей деген агент-досы бар. Сол кісі маған Кипрден осындай нұсқа бар екенін айтты. Төрт ай сол жақта ойнасаң, келесі жылдың қаңтарында, яғни, трансфер кезеңі ашылған кезде, басқа клубқа ауысу мүмкіндігі болатынын жеткізді. Оның үстіне, дәл сол кезде «Қайратқа» қатысты мәселелерім де шешілмей жатты.

Сондай-ақ Ғалымжан өзіне қатысты айтылатын сын-пікірлерге де жауап берді:

«Соңғы жылдары, атап айтсақ, Кипрде де, Қазақстан жастар құрамасында да бапкерлердің маған көңілі толады. Олармен байланысым жақсы. Константин Горовенкомен де жақсы қарым-қатынастамын. Соңғы жылдары барлық бапкерлер маған дән риза. Ал «Қайратта» неліктен маған көңілі толмағанын білмеймін. Менен көп үміт күткеннен шығар солай болғаны. Мүмкін мен жақтан да мәселе болған шығар. Қазір бапкерге қатысты ешқандай проблема жоқ. Менен күткен нәрсені көрсете алмағандықтан, бапкерлердің маған деген ойлары өзгерген шығар».

Ғалымжан 2023 жылдың тамызынан желтоқсанына дейін Кипрдің екінші дивизионындағы «Акритас» клубында ойнады. Ол жақта 15 матч өткізіп, 5 гол мен 1 нәтижелі пастың авторы атанды.