Матч орталығы
«Тоғыздықты сездім»: Кәрімов – Словакия қақпасына соққан голы туралы
30 қыркүйек, 03:52

Фото: Рамазан Кәрімов
Қазақстан құрамасының шабуылшысы Рамазан Кәрімов Ұлттар лигасы аясындағы Словакияға (1:2) қарсы матчтан кейін ASnews.kz тілшісіне сұхбат беріп, ойын нәтижесі мен әдемі голы туралы әсерімен бөлісті.
«Ұлттық құрама сапында гол соғу – бала кезімдегі арманым еді. Бұл голымды жақында ғана туған күндерін атап өткен ата-анама арнаймын. Гол соғатын сәтте тура тоғыздықты көздеген жоқпын, тек соққыны іштей сездім.
Меніңше, бұл ойында біз екі ұпай жоғалтып алдық. Қарымта шабуылдарда екі жақсы мүмкіндігіміз болды. Егер соларды голға айналдырғанымызда, бүгін жеңіске жетуге болар еді. Енді Астанаға барып, ойынды саралаймыз. Словакия айтарлықтай қысым көрсетті, бірақ бізде де мүмкіндіктер болды. Алдағы үйдегі ойындарда алты ұпай алуға толық мүмкіндігіміз бар. Бұйырса, стадионда жанкүйерлерімізді күтеміз», – деді Кәрімов.
Қазақстан құрамасы Кошицеде өткен Ұлттар лигасының екінші тур ойынында Словакияға 1:2 есебімен есе жіберді. Қазақстандықтар сапынан жалғыз голды 35-минутта айып алаңының сыртынан Рамазан Кәрімов соққан болатын. Ол Арсен Әшірбек пен Жасұлан Әмір бастаған шабуылды сәтті аяқтады. Екі турдан кейін Қазақстан қоржынында бір ұпай бар.
Әлім Динасылов