«10 сағат пен негізгі ойыншыларымыздан айырылдық»: Ван’т Схип – Фарермен болатын ойын туралы

Қазақстан құрамасының бас бапкері Джон ван ’т Схип Ұлттар лигасының Фарер аралдарына қарсы алғашқы ойыны алдында өткен баспасөз мәслихатында кездесу туралы өз ойымен бөлісті. Матч ертең, 26 қыркүйекте, жергілікті уақыт бойынша сағат 21:00-де өтеді.

Нидерланд маманы сөзін Қазақстан армиясы қатарында болған қайғылы жағдайға байланысты көңіл айтудан бастады.

Маңғыстау облысындағы қайғылы жағдай туралы

«Алдымен Қазақстанда елге қызмет етіп жүрген жас азаматтардың қайғылы қаза болуына байланысты олардың отбасыларына шын жүректен көңіл айтқым келеді. Бұл – өте ауыр қайғылы оқиға. Қазір бар ойымыз – ойыншылар мен жаттықтырушылар штабының ойы – олардың отбасыларымен және бүкіл Қазақстан халқымен бірге. Әрине, өмір футболдан әлдеқайда маңызды».

Ауа райына байланысты рейстің 10 сағатқа кешігуі туралы

«Біз автобуспен әуежайға бара жатқан кезде ұшақтың рейсі тоқтатылғаны туралы хабар алдық. Қайта оралуға тура келді. Алайда қонақүйдегі бөлмелерді өткізіп қойған едік, сондықтан жігіттердің демалуы үшін бұл мәселені қайта шешуге тура келді.

Әрине, мұның дайындығымызға әсері бар. Біз шамамен 10 сағат жоғалттық және жоспарлағанымыздан кеш жеттік. Бірақ біз кәсіби мамандармыз. Бұл жағдайды қабылдап, дұрыс дайындалуымыз керек. Жаттығу барысына бұл ешқалай әсер еткен жоқ».

Сәтпаев, Самородов және Чесноковтың жоқтығы туралы

«Қазір шетелде жоғары деңгейде өнер көрсетіп жүрген негізгі шабуылшылардың жоқ екенін түсінеміз. Бірақ мұндай жағдайда ештеңе істей алмайсың. Дастан Сәтпаев бірнеше аптаға қатардан шықты.

Ислам Чесноковтың ойнай алмайтынын 10 күн бұрын білгенбіз. Оның қызыл қағазға байланысты дисквалификациясы бар, сонымен қатар жарақат алған.

Ал Максим Самородов клубындағы соңғы ойынында жарақат алып қалды.

Бірақ бұл – футбол. Капитанымыз командаға тамаша үлгі көрсетіп жүр, ал барлық ойыншы оның соңынан еріп келеді. Мен командаға толық сенемін. Жігіттердің Қазақстан жанкүйерлерінің алдында өздерін жақсы қырынан көрсетуге деген ынтасы зор екеніне сенімдімін».

Фарер аралдары мен ойын жоспары туралы

«Соңғы уақытта Фарер аралдары жақсы нәтижелер көрсетіп жүр. Олардың ойын жоспары өте анық. Олар ашық ойнайды, қарсы шабуылдарға сүйенеді, қаптал арқылы жылдам шабуыл ұйымдастырады және жиі айып алаңына доп асырады.

Сонымен қатар стандартты жағдайларда – бұрыштамалар мен аут кезінде – өте қауіпті. Сондықтан өз қақпамыздың маңында стандартты жағдайлардың санын барынша азайту біз үшін өте маңызды.

Біз өз ойынымызды көрсетуіміз керек: допты бақылауда ұстап, алғашқы мүмкіндік туғанда шабуылға шығуымыз қажет. Бірақ сонымен қатар сабырлы болған жөн. Алға қарай ойнап, бос аймақтарды тиімді пайдаланып, гол соғатын мүмкіндіктерді нәтижелі жүзеге асыру маңызды.

Біз осы мәселелердің барлығын апта бойы пысықтадық. Қарсылас қазір жақсы формада және өз күшіне сенімді. Дегенмен мен бұл жерде оң нәтижеге қол жеткізе алатынымызға сенемін».

«Қайсар» қақпашысы Нұрымжан Салайдин туралы

«Біз назарымызға іліккен әр ойыншыны бақылап отырамыз. Қақпашылар бапкерімен үнемі байланыстамын. Оның пікірі біз үшін өте маңызды. Дегенмен негізгі құрамда кім шығатыны туралы соңғы шешімді мен қабылдаймын.

Ұлттық құрамада ойнайтын футболшылардың ешқайсысына кепілді түрде негізгі құрамнан орын берілмейді. Әр футболшы өз орнын еңбегімен алу керек.

Салайдинге келсек, чемпионаттағы сейвтер саны бойынша көш бастап тұруы оны автоматты түрде ең үздік қақпашы етпейді. Дегенмен ол расында да жақсы қақпашы.

Біздің ұлттық құрамада бұл позицияға қойылатын өз талаптарымыз бар. Қазіргі таңда құрамымызда шын мәнінде мықты төрт қақпашы бар».

Ұлттар лигасының алғашқы турындағы Фарер аралдары мен Қазақстан арасындағы матч 26 қыркүйекте Торсхавн қаласында өтеді. Ойын Қазақстан уақытымен кешкі 21:00-де басталады.

Қазақстан құрамасын тамыз айында ресми түрде қабылдаған нидерландтық маман Джон ван ’т Схип үшін бұл кездесу ұлттық құраманың бас бапкері ретіндегі алғашқы ресми ойыны болмақ.

Қазақстан құрамасы өнер көрсететін топта Фарер аралдарынан бөлек Словакия және Молдова құрамалары да бар.