«Тобыл» шабуылдағы көшбасшыларының бірімен келісімшартты ұзартты

Қостанайлық «Тобыл» 24 жастағы жартылай қорғаушы Жасұлан Жұмашевпен келісімшарт мерзімін ұзартқанын ресми түрде мәлімдеді, деп хабарлайды ASnews.kz.

Хавбекпен жаңа келісім 2027 жылдың соңына дейін есептелген.

Жұмашев – қостанайлық футбол мектебінің түлегі, ол негізгі команда сапында Премьер-лигада алғаш рет 2020 жылы өнер көрсеткен еді. Өткен маусымда жартылай қорғаушы шабуылдағы ең нәтижелі ойыншылардың бірі ретінде өзін мойындатты: барлық турнирдегі 24 матчта 9 гол соғып, 2 нәтижелі пас берді.

«Гол + пас» жүйесі бойынша (11 ұпай) Жұмашев «Тобылда» екінші көрсеткішке ие болып, тек 13+3 ұпай жинаған сербиялық шабуылшы Урош Миловановичке ғана жол берді.

Еске салсақ, 2026 жылғы маусымның қорытындысы бойынша «Тобыл» 41 ұпай еншілеп, ҚПЛ турнирлік кестесін жетінші орында аяқтаған болатын.