«Әрдайым ұлттық құрамада ойнауға дайынмын»: Покатилов – командаға шақырылуы туралы

Әзербайжандық «Сабахтың» қақпашысы Стас Покатилов берген сұхбатында Қазақстан ұлттық құрамасы сапында ойнаудан бас тартты деген қауесеттерге пікір білдіріп, бұрынғы бапкерлік штабтармен арадағы қарым-қатынасы жайлы айтып берді, деп хабарлайды ASnews.kz.

«Мен әрдайым құрамаға шақыртылуға дайынмын. Кез-келген уақытта қайтадан команда сапында ойнап, көмектесуге қуана-қуана дайынмын – бұл мен үшін үлкен мәртебе болған, әлі де солай және солай болып қала береді. Мені құрамада өнер көрсетуден бас тартты деген сөздер тарапты. Бұл шындық емес, бірақ белгілі бір нюанстар бар.

Командада Магомед Адиев жұмыс істеп жүргенде, қандай жағдай болмасын, құрама қақпасын басқа қақпашы қорғайтынын маған ашық аңғартты. Бірақ, түсініңіздерші, онда менің келуімнің қандай мәні бар? Талғат Байсуфиновтың штабымен де сөйлескенмін. Ол кезде құрамаға қажет екенімді сездім және оны айттым да. Бірақ маған қайтадан сенім артылмайтынын ұқтым – тек жастарға қолдау көрсету тұрғысынан болмаса.

Әрине, ұлттық құрама – әрбір спортшы үшін ең биік шың. Бірақ жеке амбициялар бар, оның үстіне жас та келіп қалды, сондықтан шындыққа тура қарау керек. Менің де өз клубым бар, онда да үлкен мақсаттарға қол жеткізу үшін жұмыс жасап жатырмыз. Құрамадағы жаттығулар клубтағы жаттығулардан түбегейлі ерекшеленеді. Тіпті ойын практикасын айтпағанда, бабымды да жоғалтып аламын. Осы тұста мені түсінуге болады деп ойлаймын: мен жай ғана жаттығу үшін келуге дайын емеспін.

Дегенмен, мен әрдайым құрама жағындамын және шын жүрегіммен оның матчтарына қатысқым келеді. Өзімді жүз пайыз шынайы патриот деп есептеймін, ешкім маған керісінше айтып, кінә таға алмайды. Әркімнің алдында ақтала алмаймын ғой. Өзіме толықтай сенімдімін және не айтып тұрғанымды, жүрегімде қандай сезім бар екенін жақсы түсінемін», – деп келтіреді Покатиловтың сөзін журналист Тимур Камашев.

Покатилов өнер көрсететін «Сабах» Чемпиондар лигасының плей-офф раундына шықты. Әзербайжандық клуб қарымта кездесуде даниялық «Орхусты» 4:0 есебімен тас-талқан етті (алғашқы матч – 1:2). Топтық кезеңге шығу үшін «Сабах» израильдік «Хапоэль» Беэр-Шевамен» таласады.

33 жастағы қақпашы Қазақстан ұлттық құрамасы сапында 29 матч өткізді. Соңғы рет ол ұлттық құрама жейдесінде 2025 жылы Беларуське қарсы жолдастық кездесуде (1:4) алаңға шыққан. 2025 жылдың қазан айында Лихтенштейн (4:0) мен Солтүстік Македонияға (1:1) қарсы ойындарға шақырылғанымен, қосалқы құрамда қалған еді.

Покатилов «Сабах» сапында Әзербайжан чемпионы және ел Кубогының екі дүркін иегері атанды. Ал Қазақстанда қақпашы «Қайратпен» бірге чемпион болып, «Тобылмен» Суперкубокты ұтып алды және төрт рет Қазақстан Кубогын басынан жоғары көтерді.

Тамыз айында Қазақстан құрамасының бас бапкері болып нидерландылық маман Джон ван ‘т Схип тағайындалды. Қыркүйекте ұлттық құрама Ұлттар лигасында Фарер аралдары, Словакия және Молдова құрамаларына қарсы ойнайды.

Джон ван 'т Схип: өмірбаяны, толық ақпарат, жалақысы, жеке өмірі. Қазақстан ұлттық құрамасының жаңа бас бапкері