«Қазақстан құрамасынан ұсыныс түскен жоқ»: Шпилевский – өз болашағы туралы

Алматылық «Қайраттың» бұрынғы бас бапкері Алексей Шпилевский ASnews.kz басылымына берген сұхбатында бұқаралық ақпарат құралдарында тараған Қазақстан футбол федерациясының (ҚФФ) ұлттық құраманы басқару туралы ұсынысынан бас тартты деген ақпаратқа қатысты пікір білдірді.

«Маған қызықты болар еді»

«Федерацияның ұсынысынан бас тартты деп жазып жатыр ма? Егер ұсыныс болғанда, мен оны қабылдауым немесе бас тартуым мүмкін еді, бірақ, өкінішке қарай, ол әлі болған жоқ. Қазақстан федерациясының шынайы қалауы не екенін білмеймін. Әрине, мен өзімді тықпалап отырған жоқпын, өйткені қазір болашағымдағы келесі маңызды қадамды таңдап жатқан кезеңдемін.

Қағаз жүзінде бұл маған қызықты болар ма еді? Әрине, бұл туралы ойланып, пікір таластыруға болады. Дәл осы Қазақстан футболындағы қазіргі жағдайды ескере отырып, мұндай ұсынысты қарастыру қисынды болар еді».

Боранбаев, «Қайраттың» іргетасы және Сәтпаев туралы

«Бұл идеяның ең басты бастамашысы Қайрат Советайұлы Боранбаев сияқты. Бұл қисынды да болар еді, өйткені біз бапкерлік штабыммен «Қайратта» болған уақытта не салынғанын және не сақталғанын қазір көріп отырмыз. Осы іргетастың арқасында «Қайрат» еурокубоктарда да нәтиже көрсетіп жатыр.

Қазір ұлттық құрамада да жарқырап жүрген жас буын өкілдері өте көп. Соның бірі – Дастан Сәтпаев. Өзімді тым асыра мақтағым келмейді, бірақ негіз 2018 жылы біз «Қайратқа» жұмыс істеуге келгенде қаланды деп ойлаймын. Бұл қуантады. Бұл бағытты Қазақстан құрамасында да жалғастыру қисынды болар еді, өйткені мен білетін жас, дарынды жігіттер өте көп», – деді Шпилевский.

Бұған дейін футбол мен волейболды шолатын блогер Эльдар Аманбаев ҚФФ ұлттық құраманың бас бапкері лауазымына Алексей Шпилевский мен швейцариялық Фабио Челестинидің кандидатураларын қарастырғаны туралы жазған болатын. Дереккөздердің мәліметінше, федерация «Қайраттың» бұрынғы бапкерімен келіссөз жүргізген, бірақ беларусьтік маман ұсыныстан бас тартқан-мыс. Ал Челестинимен тараптар келісімшарттың қаржылық шарттарына байланысты келісімге келе алмаған.

Еске сала кетейік, 22 маусымда ұлттық құрамадан Талғат Байсуфинов кеткен болатын, осыдан кейін ҚФФ жаңа бас бапкер іздеуге кірісті.

«Қарсыласты сыйлаймыз, бірақ ешкімнен қорықпаймыз»: Уразбахтин «Левскимен» өтетін матч пен «Қайраттың» трансферлері туралы