Жуков – әлеуметтік желідегі посттары жайлы: мұным дұрыс болмады

Қазақстан құрамасы мен «Ақтөбе» клубының жартылай қорғаушысы Георгий Жуков BorodAbata.kz сайтына берген сұхбатында осы уақытқа дейін әлеуметтік желіде жариялаған мәлімдемелерінің қате болғанын мойындады.

– Әлеуметтік желіде көп мәлімдеме жасадың. Есейе келе, бұл әрекетіңе өкіндің бе? Себебі жанкүйерлермен араңда көп түсініспеушілік болды.

– Әрине, өкінемін. Қазір ойланып қарасам, бұл маған не берді? Ештеңе. Көп сөздің қажеті жоқ екен. Өз-өзіме зиянымды тигіздім. Жоқ жерден конфликт туғыздым. Бұл ақымақтық болды. Егер менің 19-20 жастағы досым немес ұлым болса, оған айтып түсіндірер едім. Бірақ бұл маған сол кезде ақыл айтатын адам болмады дегенді білдірмейді. Ата-анам білгенін үйретіп, мені қорғайтын. 19-20 жастағы балаға бұлай қатты қысым көрсету де дұрыс емес. Мені ересек адам көріп, қатты талқылады. Қазір ойланамын: «мұны жасаудың не қажеті бар еді?» деп. Көп сөйлеудің қажеті жоқ екен.

– Сенің менталитетің қазақстандық футболшыларға қарағанда басқаша болды. Өз ойыңды ашық айтып жүрдің. Бұл әрекетіңе өкінесің бе?

– Иә, өкінген сәттерім болды. Кейбір кездері бірдеңені дәлелдегім келіп, әділетті іздеуді көздедім. Бірақ бұл ешкімге керек емес екен. Мәселені ортақ шешуді қалайсыз. Бірақ олай болмайды. Провакацияға да берілген сәттерім бар. Өсе келе, тәжірибемен барлығы дұрысталды. Әрқашан өз ойымды ашық айтатынмын, ауыр сөздер де айттым. Себебі мен көргенімді әрқашан есте сақтап қаламын. Егер біреу менімен әзілдескісі келсе, оған басқаша жауап бердім. Бірақ бұл дұрыс болмаған екен.

– Ұлттық құрамада Қайрат Боранбаев айтқаннан кейін ғана ойнадым деген сөзіңе жанкүйерлер ренжіп қалды.

– Көбісі мені жамандап, негатив көп тудыру үшін осыны естігісі келді. Егер біреуді ренжіткен болсам, шын жүректен кешірім сұраймын. Бірақ бұған қуанған адамдар да болды. Себебі олар отқа май құйып, жағдайды ушықтырғысы келді. Бұл оларға абырой әкелмейді.