Рамазан Оразов – «Силькеборгтағы» ойын уақыты туралы: негізгі құрамға оралу қиын

Қазақстан құрамасының жартылай қорғаушысы Рамазан Оразов BorodAbata.kz сайтына берген сұхбатында «Силькеборг» сапында ойын уақыты үшін күресте кездесетін психологиялық қиындықтар туралы айтып берді.

«Мен әрқашан шетелде ойнауды армандап, соған қарай ұмтылдым. Басында-ақ мықты лигаға түскім келді. Бірақ жасыма байланысты қиын болды. Егер басқа ойыншыларды мысалға алсам, тәжірибе жинау үшін әртүрлі лигаларға барар едім. Мен Данияны бірінші кезекте трамплин деп санадым. Бұл жақта бәрі жақсы болады деп үміттендім және әлі де үмітімді үзбеймін. Бұл жерде футбол біздегідей емес, басқа деңгейде. «Силькеборг» өз ойыншыларын топ-5 лига клубтарына сатады. Клуб 2023 жылы қызығушылық танытқаннан бері әйелім екеуміз команданы, қаланы және Даниядағы өмірді бақылап келеміз. Мұнда өмір сүру деңгейі өте жоғары – отбасым үшін бәрі қауіпсіз. Футболдан тыс өмір де жоғары деңгейде.

Футболға келер болсақ: бастапқыда «Мольдеге» қарсы матчта қызыл қағаз алып, клубтың Еуропа лигасынан ұшқанына қарамастан, бапкерлер штабы мен басшылық тарапынан маған ойын уақыты жақсы беріліп, үлкен сенім артты. Бұл сәтсіздікке әлі күнге дейін өзімді кінәлаймын, бірақ мені клуб президенті де, бапкер де қолдады. Барлығы қолдау көрсетті.

Ойын уақыты? Қазір болып жатқан жағдайға төтеп беру психологиялық тұрғыдан өте қиын. Мен әлі де командамен бірге жаттығып, алаңдағы орнымды алуға тырысамын. Қазір клубтың қандай да бір жолмен мені қайта сату нұсқасы бойынша жұмыс істеп жатқанын түсінемін. Жергілікті ойыншыларға артықшылық беріледі. Өзімді супер ойыншымын деп айтпаймын – қазір ойнап жүрген жігіттердің маған қарағанда жақсырақ және нәтижелі екенін мойындаймын. Менің позициямдағы екі жартылай қорғаушы қосылып 30 гол соқты. Қазір негізгі құрамға оралу қиын. Жарақатыма қарамастан жаттығуда барымды салуға тырысамын. Бұл футбол – сондықтан қиын болады», - деді Оразов.

2024 жылғы маусымда Рамазан Оразов «Силкеборг» сапында 24 матчқа қатысқанымен, алаңда 798 минут өткізді.

27 жастағы жартылай қорғаушы Қазақстан құрамасының маусым айындағы Беларусь (1:4) және Солтүстік Македониямен (0:1) өткен матчтарына шақыртылған жоқ.

Оразов бұған дейін 2022 жылдың соңында оған қызығушылық танытқан «Силькеборг» клубымен келіссөздер қалай өткені туралы айтқан болатын.