Исламхан – ӘЧ-на шығу арманы жайлы: талантты жастар болғанымен, тұрақтылық жоқ

Қазақстан құрамасының бұрынғы капитаны Бауыржан Исламхан ASnews.kz сайтына берген сұхбатында ұлттық құраманың ірі халықаралық турнирге шығу мүмкіндігін бағалады.

«Бүкіл ел ұлттық құрамамыздың үлкен турнирге жолдама алуын армандайды. Иә, біз Бельгиямен тең ойнадық. Бірақ бәрі бір ғана ойынға байланысты емес. Егер бәрін бір матч шешетін болса, біз баяғыда-ақ Еуропа чемпионатында ойнаған болар едік, себебі бұған дейін Данияны да жеңгенбіз. Құрамамызға тұрақтылық жетіспейді. Үнемі «уақыт керек» деп айтып келеміз», – деді футболшы.

Соған қарамастан, Исламхан тарихи жетістіктің ауылы алыс емес екеніне сенеді:

«Бізде өсіп келе жатқан талантты жастар бар. Соларды қолдап, сенім артуымыз керек. Алдағы жылдары нәтижелер болады деп сенемін», – деп атап өтті ол.

2026 жылғы әлем чемпионатының іріктеу кезеңінде Қазақстан құрамасы J тобында өнер көрсетіп, 8 ұпаймен төртінші орынға тұрақтады. Әлем чемпионатына берілетін тікелей жолдаманы Бельгия (18 ұпай) иеленсе, Уэльс (16 ұпай) плей-офф кезеңіне жолдама алды. Біздің құраманың алдына Солтүстік Македония жайғасса, турнир кестесін Лихтенштейн түйіндеді.