Исламхан – ұлттық құрамада ерте жастан капитан болғаны жайлы: көбіне үлкендер сөйлейтін

Қазақстан құрамасының бұрынғы жартылай қорғаушысы Бауыржан Исламхан ASnews.kz сайтына берген сұхбатында алғаш рет ұлттық құрамада капитан болған кезін еске алды.

– Өз уақытыңда өте жас шағыңда капитан болдың. Киім ауыстыратын бөлмеде сөз сөйлеп, команданы жігерлендіретін кездерің болды ма?

– Иә, капитан болдым, бірақ сонымен қатар командадағы ең жас ойыншы едім. Ұлттық құрамада әрдайым үлкендерге деген құрмет болды. Біз үнемі сондай ойыншылардың сөзіне құлақ асатынбыз, ойын алдында да көбіне солар сөйлейтін.

Ардагерлер бізге қарағанда көп нәрсені көрген, тәжірибесі мол, сондықтан сөзді соларға бергенді жөн көретінбіз.

«Дедовщина» деген болды ма? Жоқ, біздің құрамада ондай ешқашан болған емес. Иә, мен командаға өте ерте жаста келдім, бірақ қарым-қатынас өте жақсы болды. Ол кезде бірге ойнаған жігіттердің көбі қазір бапкерлік қызметте жүр.

Бауыржан Исламхан ұлттық құрамадағы дебютін 2012 жылдың ақпан айында Латвия құрамасына қарсы жолдастық кездесуде өткізді (0:0).

Ал капитан ретінде алғаш рет 2016 жылдың қыркүйегінде Польшаға қарсы матчта (2:2) алаңға шықты. Ол кезде Исламхан небәрі 23 жаста болған.

Бұған дейін Бауыржан ұлттық құраманың тізгінін қандай маман ұстауы керек деген сұраққа да жауап берген еді.