Исламхан – ардагер футболшылардың ұлттық құрамадан кетуі жайлы: оларды ешкім қуған жоқ

Қазақстан құрамасының бұрынғы капитаны Бауыржан Исламхан ASnews.kz сайтына берген сұхбатында ұлттық құрамадағы буын алмасу процессі мен тәжірибелі ойыншылардың мансабын аяқтау туралы шешіміне пікір білдірді.

– Ұлттық құрамадағы мансабын Александр Марочкин мен Асхат Тағыберген аяқтады. Сонымен қатар Исламбек Қуат та кетуді жоспарлап отыр. Ардагерлерсіз ойнау қаншалықты қиын болады?

– Әр нәрсенің өз уақыты бар. Менің ойымша, дер кезінде кету – дұрыс шешім. Егер өзіңнің командаға бұрынғыдай көмектесе алмайтыныңды сезсең, орныңды жас ойыншыларға беру қалыпты жағдай. Иә, жігіттер ұлттық құрамадан өз еркімен кетті. Оларды ешкім қуған жоқ. Барлығы лайықты түрде шығарып салды.

2026 жылғы әлем чемпионатының іріктеу кезеңі барысында ұлттық құраманың капитаны Асхат Тағыберген мен қорғаушы Александр Марочкин ұлттық құрамадағы мансабын аяқтады. Сондай-ақ бұқаралық ақпарат құралдарында жартылай қорғаушы Исламбек Қуат та жуырда осындай шешім қабылдауы мүмкін екені туралы ақпарат тарады.