Георгий Жуков: тұрақты түрде ойнап жүрсем де, ұлттық құрамаға шақырмады

Қазақстан құрамасы мен польшалық «Пуща» клубының жартылай қорғаушысы Георгий Жуков BorodAbata.kz сайтына берген сұхбатында Магомед Адиев туралы пікірімен бөлісті және үш жыл бойы ұлттық құрамаға неліктен шақыртылмағанын түсінбейтінін мәлімдеді.

«Мен Магомед Адиевпен бірде-бір рет сөйлеспедім. Тіпті білмеймін де, мүмкін ол менен бірінші болып хабар күткен шығар. Бұл менмендік емес, мүмкін мен жазуға ұялған шығармын. Оның не ойлағанын да білмеймін. Ол менімен мүлдем сөйлеспеді. Мүмкін басқа біреулерден мен туралы сұрастырып білген шығар.

Бірақ карантинге дейін, яғни Қытайда жүрген кезімде де ұлттық құрамаға шақырту алмадым. «Вислада» ойнаған кезімде Әзербайжанға қарсы матч болды. Сол сәтте де менімен ешкім байланысқа шықпады. Осы уақытқа дейін шақыртылып жүрдім ғой. Молдовамен болған ойында гол соқтым. Одан кейін де «Вислада» тұрақты түрде ойнап жүрсем де, Қазақстан құрамасынан ешкім хабарласпады. «Мүмкін бәсекелестікке шыдай алмадым, мүмкін ойын уақыты жетіспеген шығар» деп ойладым. Кейін Қытайға кетіп, сол жақта ойнай бастадым. Ештеңе етпейді, өмір жалғасады, отбасымды асырау керек болды», – деді Жуков.

30 жастағы футболшы 2022 жылдың наурызынан 2025 жылдың наурызына дейін Қазақстан құрамасына шақыртылмады.