Бауыржан Исламхан – Черчесовтің жұмысы жайлы: ол кісіден үйренгеніміз көп

Қазақстан ұлттық құрамасының экс-капитаны Бауыржан Исламхан ASnews.kz сайтына берген сұхбатында бұрынғы бас бапкер Станислав Черчесов туралы өз ойын айтты.

«Станислав Саламұлының бапкерлік тәжірибесі өте мол. Ол – мықты әрі білікті маман. Ол кісіден үйренгеніміз көп болды, өйткені Черчесов келгелі біз төрт қорғаушымен ойнайтын жүйеге, яғни мүлдем басқа философияға көштік. Көптеген клубтарды жаттықтырған маман тек сәттіліктің арқасында ғана жүрмейді ғой. Қазақстан футболына үлкен үлесін қосты деп ойлаймын», – деді Исламхан.

Сондай-ақ, жартылай қорғаушы бапкерге бағытталған сыни пікірлерге қарамастан, команда ішіндегі болған атмосфера туралы айтты.

«Ал Черчесовке айтылған сынға келсек, футболшы ретінде біздің ол кісімен қарым-қатынасымыз жақсы болды. Басқасын білмеймін, әркімнің өз пікірі бар ғой, бірақ біз ол кісімен жақсы тіл табыстық», – деп қорытындылады сөзін ұлттық құраманың экс-капитаны.

Еске салайық, Станислав Черчесов Қазақстан құрамасын 2024 жылдың жазында қабылдап алған болатын. Биылғы жылдың қаңтар айында ресейлік маманның жұмыстан босатылғаны жайлы мәлімденді.

Бұған дейін Исламхан «Қайрат» сапында өнер көрсетіп жүрген кезінде қандай шетелдік клубтардан ұсыныс түскенін айтты.

Толық шығарылымды көру