ҚФФ президенттігіне үміткер – сайлаудағы қысым жайлы: «келме, әйтпесе үлкен қиындық болады» деді

Қазақстан футбол федерациясы (ҚФФ) президенті қызметіне үміткер болған белгілі спорт журналисі әрі комментатор Ербол Қайыров былтырғы сайлаудағы жанжал туралы айтып берді, деп хабарлайды ASnews.kz.

A2 YouTube-подкастында экс-үміткер жеңіске жететініне шын сенгенін, алайда дауыс беру процесі кезінде кедергілерге тап болғанын мойындады.

«Мен жеңіске жеткім келді және оған шын жүректен сендім. Бірақ жағдай былай болды: Ақмола футбол федерациясында жұмыс істеген және мені сол жақтан ұсынған адам дауыс бере алмады. Өйткені оған: «Сайлауға келме, әйтпесе үлкен қиындықтар (проблемалар) болады», – деп айтқан. Нәтижесінде оның орнына федерация құрылымында жұмыс істемейтін мүлдем басқа адам келіп, өзге кандидатқа дауыс берді», – деді Қайыров.

Сол сайлау қорытындысы бойынша Ербол Қайыров конференция мүшелерінен бірде-бір дауыс жинай алмады. Федерацияның жаңа басшысы болып 34 дауыс жинаған Марат Омаров сайланды. Тағы екі дауыс Алтай Даумовқа бұйырды.

Аталмыш сайлау науқаны басқа үміткерлердің жарыстан шығуымен де есте қалды: Давид Лория дауыс беру басталмас бұрын Омаровтың пайдасына өз кандидатурасын алып тастады. Ерлан Жамантаев та сайлауға қатысудан бас тартты.