АПЛ-дың бұрынғы шабуылшысы – Коулман жайлы: ойыншыларға өздерін жеңілместей сезіндіреді

Уэльс құрамасының және ағылшын Премьер-лигасы клубтарының бұрынғы шабуылшысы Натан Блэйк ASnews.kz сайтына берген сұхбатында Крис Коулманның Қазақстан құрамасының бас бапкері лауазымына тағайындалу ықтималдығына қатысты пікір білдірді.

«Крис Коулман – керемет жігіт және түрлі мәдениеттерде жұмыс істеген мол тәжірибесі бар жақсы бапкер. Егер тіл кедергісі болмаса, ол Қазақстан құрамасының ойыншыларына өздерін жеңілместей сезіндіреді.

Ол шынымен де ойыншыларға және ең бастысы, адамдарға қамқорлық жасайтын жақсы адам. Оның жүрегі кең», – деді Блэйк.

Натан Блэйк ағылшын футболында ұзақ уақытын өткізіп, клубтық деңгейде 450-ден астам матчқа қатысып, 140-тан астам гол соққан. АПЛ-да «Болтон», «Блэкберн», «Вулверхэмптон» және «Лестер» намысын қорғады. Уэльс құрамасы сапында шабуылшы 30 ойын өткізген. Қазіргі уақытта Блэйк сарапшы болып жұмыс істейді.

Қазақстан футбол федерациясы 55 жастағы Крис Коулманды бас бапкер қызметіне үміткерлердің бірі ретінде қарастыруда. Оның мансабындағы басты жетістігі – Уэльс құрамасымен Еуро-2016 турнирінің жартылай финалына шығуы. Сондай-ақ ол англиялық «Фулхэм» мен «Сандерленд», испаниялық «Реал Сосьедад» және грекиялық клубтарды жаттықтырған.